Қазақистанда мәшһур нахшичи абдуреһим әхмиди хатириләнди

Мухбиримиз үмидвар
2018-04-01
Елхәт
Пикир
Share
Принт

Йеқинда қазақистанниң алмута шәһиригә җайлашқан қуддус ғоҗамяроф намидики дөләт академийәлик уйғур музика-комедийә тиятирида һазирқи заман уйғур тиятир вә нахша-музика сәнитиниң йирик намайәндилиридин бири, «өзбекистан хәлқ артиси» абдуреһим әхмиди тәвәллутиниң 90 йиллиқиға беғишланған мәхсус нахша-музикилиқ хатириләш мурасими болуп өткән. Арқидин қазақистандики җумһурийәтлик уйғур гезити «уйғур авази» му мәхсус абдуреһим әхмидиниң иҗадий һаятиға аит бир парчә мақалә елан қилди.

Абдуреһим әхмидигә беғишланған кәчлик паалийәткә бир қисим тонулған уйғур нахшичи-музикантлири қатнишип, мәхсус абдуреһим әхмиди нахшилири вә башқа уйғур хәлқ нахшилирини орундаш билән биргә мәзкур атақлиқ нахшичиниң һаят мусаписи әсләп өтүлгән. 

«Уйғур авази» дики гүлбаһар насирова исимлик аптор имзасидики «қәшқәрдин аңланған аһаң» мавзулуқ мақалидә қәйт қилинишичә, қәшқәрдә туғулған абдуреһим әхмидиниң дәсләпки сәнәт һаяти 1948-1950-йили ғулҗа қатарлиқ җайларда өткән вә миллий инқилаб рәһбири әхмәтҗан қасиминиң алаһидә етибар беришигә еришкән. 

Абдуреһим әхмиди 1950-1961-йили арисида үрүмчидики нахша-уссул ансамбилида ишлигән болуп, у бу җәрянида хәлқаралиқ яшлар фестивалиға қатнашқан һәм уйғур хәлқи арисида кәң тонулған, сөйүмлүк нахшичиға айланған. Униң муңлуқ вә өзгичә йеқимлиқ авазда орундиған «тәнлирим япрақ», «зөһрә җаним», «яро» вә башқа бир қатар нахшилири уйғурлар арисида чоңқур тәсир қозғиған иди.

Абдуреһим әхмиди әйни вақиттики хитай һөкүмити башлиған түрлүк сиясий һәрикәтләрдә изтирап чәккән уйғур мәдәнийәт, сәнәт әрбаблири, әдиблири, сабиқ шәрқий түркистан җумһурийити миллий армийисиниң офитсерлири, йәни, зия сәмәди, зунун тейипоф, йүсүпбек мухлиси, абдурәуп мәхсум ибраһими вә башқиларни өз ичигә алған миңлиған кишиләр қатарида 1961-йили, совет иттипақиға кетип, һаятини өзбекистан вә қазақистанда өткүзүп, «өзбекистан хәлқ артиси» дегән алий намға сазавәр болған. У, бу җәрянда уйғур 12 муқамини рәтләш, лентиға елишқа актип қатнишип өз һәссисини қошқан. Абдуреһим әхмиди 1999-йили вапат болған иди.

Толуқ бәт