B d t kishilik hoquq kéngishide Uyghur mesilisini muzakire qilish layihesi 2 awazning kem bolushi bilen ret qilindi

Birleshken döletler teshkilatining kishilik hoquq kéngishi, xitay hökümitining Uyghur élida yürgüzüwatqan zulumlirini muzakire qilishni ret qilghan.

B d t kishilik hoquq aliy komissarliqining Uyghurlar heqqidiki mexsus doklatida, xitay hökümitining Uyghurlargha qarshi insaniyetke qarshi jinayet sadir qilghan bolushi mumkinliki otturigha idi. Buning bilen 26-séntebir küni, b d t kishilik hoquq kéngishining 51-nöwetlik yighinida amérika bilen en'gliye bashchiliqidiki 8 dölet, b d t kishilik hoquq kéngishining kéler qétimliq yighinida xitayning Uyghurlargha tutqan mu'amilisini muzakire qilishni telep qilip, bir teklip layihesi sun'ghan idi.

6-Öktebir küni mezkur layihe kishilik hoquq kéngishide awazgha qoyulghan bolsimu, emma 17 döletning qollap awaz bérishi, 19 döletning qarshi awaz bérishi we 11 döletning awaz bérishtin waz kéchishi netijiside, bu layihe maqullanmay qalghan.

Xitay hökümitining Uyghurlargha qiliwatqan zulumini muzakirige qoyushning xitaygha oxshash déktator döletler yaki uning puligha muhtaj bolghan qazaqistan, özbékistan, wénésu'éla, pakistan qatarliq döletlerning qarshi awaz bilen tosup qélinishi, dunyaning herqaysi jayliridiki kishilik hoquq terepdarlirini qattiq ümidsizlendürgen. Nurghun kishilik hoquq mutexessisliri buni “B d t kishilik hoquq kéngishi üchün nomus” dep bahalighan.

Xelq'ara kishilik hoquqni közitish teshkilatining tiwittérdiki inkasida diyishiche, awaz bérish netijisining nahayiti az perq bilen belgilinishi, yeni 17 ge qarshi 19 awaz bilen ret qilinishi, téximu köp döletlerning hazir xitayning bésimigha qarimay, uning kishilik hoquq depsendichilikini yoruqluqqa chiqirishni xalaydighanliqini körsitip béridiken.