П б с қанили хитайниң уйғурларни қандақ бастуруватқанлиқини тонуштурди

Мухбиримиз әркин
2019-10-07
Елхәт
Пикир
Share
Принт

Америкиниң п б с (PBS) телевизийә қанили уйғурлар һәққидә бир парчә программа ишләп, хитайниң уйғурларниң дини вә мәдәнийитини қандақ бастуруватқанлиқини хәвәр қилди.

Хәвәрдә, уйғурларниң нопуси хитай нопусиниң бир пирсәнтигә йәтмисиму, лекин уларниң заманивий дәврдики әң қорқунчлуқ кишилик һоқуқ кризисиға учраватиду, дәп қариливатқанлиқини алаһидә тәкитлигән.

Программида нуқтилиқ нөвәттә түркийәдә яшаватқан уйғур шаһитлириниң шәхси вә аилә кәчүрмишлири арқилиқ, уйғурлар учраватқан кишилик һоқуқ дәпсәндичилики, диний вә мәдәнийәт бузғунчилиқиниң көлими әтраплиқ йорутуп берилгән.

Программида түркийәдә турушлуқ гүлбаһар җелилова, абдусалам муһәммәт, йүсүп сулайман, ясин зунун, аблиз абликим қатарлиқ кишиләрниң гуваһлиқ сөзлиригә кәң йәр берилгән.

Хәвәрдә нәқил қилишичә, ясин зунун исимлик уйғур муһаҗир «улар бизниң мәдәнийитимизни рәт қилип, аяллиримизни нишанға алмақта вә уларға зиянкәшлик қилмақта» дегән.

Хәвәрдә, шаһитлар вә хәлқара көзәткүчиләр хитай һөкүмитиниң кишилик һоқуқни дәпсәндә қиливатқанлиқиға даир нурғун дәлилләр барлиқини илгири сүрсиму, лекин хитай һөкүмитиниң өз һәрикити ақлап, бу лагерларни әсәбийлик вә террорлуққа қарши «кәспий маһарәт мәркәзлири» дәп тәрипләватқанлиқини илгири сүрүлгән.

Хәвәрдә қәйт қилишичә, хитай ташқи ишлар министирлиқи әмәлдари су ге уйғур шаһитлирини мәлум сәвәбләр яки пул үчүн гуваһлиқ бериватқанлар, дәп әйиблигән болсиму, лекин тәтқиқатчилар уйғур районида аз дегәндә 85 йәрдики йиғивелиш лагерини ениқлап чиққан икән.

Хәвәрдә, бу лагерларниң мутләқ көп қисминиң йеқинқи мәзгилләр қурулғанлиқи, америка һөкүмитиниң бу лагерларда бир милйондин артуқ уйғурниң қамалғанлиқини илгири сүрүватқанлиқи тәкитләнгән.

Пикирләр (0)
Share
Толуқ бәт