Америка таможнаси лоп наһийәсидә ишләпчиқирилған 13 тонна чач мәһсулатини америка чеграсида тутуп қалған

Мухбиримиз нуриман
2020-07-01
Елхәт
Пикир
Share
Принт

Аксийос (Axios) хәвәр ториниң 1-июл бәргән хәвиригә қариғанда, америка таможна вә чегра қоғдаш хадимлири уйғур районида мәҗбурий әмгәк билән ясалған дәп гуман қилған 800 миң доллар қиммитидики 13 тоннаға йеқин чач мәһсулатлирини чеграда тутуп қалған.

Мәлум болушичә, 6-айниң 17-күни уйғур райониниң җәнубидики лоп наһийисидә қурулған «мейшин» чач мәһсулатлири чәклик ширкити ишләпчиқарған мәһсулатларниң америка чеграсидин киришини чәкләш буйруқи чүшүргән икән.

Америка таможна вә чегра қоғдаш идариси сода ишханисиниң иҗраийә ярдәмчи комиссари бренда симис бу һәқтә баянат елан қилип, мундақ дегән: «бу хил мәһсулатларниң ишләпчиқирилиши хитайниң мәзкур районда кишилик һоқуқни еғир дәпсәндә қиливатқанлиқини көрситиду. ‹Мейшин' ширкити мәһсулатлириниң тутуп қилиниши, американиң тәминләш зәнҗиридә қанунсиз вә инсанларниң қәдир-қиммити дәпсәндә қилиниш арқилиқ ишләпчиқирилған малларға орун йоқ икәнлики һәққидә берилгән очуқ агаһландуруштур.»

Хәвәргә асасланғанда, америка дөләт хәвпсизлики комитетиниң баянатчиси җон уллийот әгәр бу 13 тонна чач мәһсулати растинла бир милйондин артуқ уйғур тутқун қамалған җаза лагерлириға мунасивәтлик болуп қалса, бу хитай компартийәсиниң райондики бастуруш сияситиниң чиктин ашқанлиқини көрситидиғанлиқини билдүргән. У сөзидә йәнә хитайниң бу мәсилидә дуня җамаәтчиликигә җаваб бериши керәкликини тәкитлигән.

Хитайниң вашингтондики әлчиханиси бу тоғрилиқ соралған соалларға һечқандақ инкас билдүрмигән.

Пикирләр (0)
Share
Толуқ бәт