19-Qurultayda "Tartuqlan'ghan" chén chüen'go qurultay rohini öginish herikiti qozghighan

Muxbirimiz irade
2017-10-26
Élxet
Pikir
Share
Print

Uyghur aptonom rayonluq partkomning sékrétari chén chüen'go Uyghur élida derhal 19-qurultay rohini öginish herikiti qozghashni pilanlighan.

Bu qétimliq qurultayda xitay kompartiyesi siyasiy byurosining ezaliqigha teyinlen'gen chén chüen'go qurultay yépilghandin kéyin "Shinjang wekilliri omumiy yighini" ni chaqirghan. U yighinda "19-Qurultay rohini öginish we teshwiq qilish hemde uni emeliyleshtürüsh dolqunini tézdin qozghash kérek, uni muhim siyasiy wezipe qilip, 'junggo arzusi' ning shinjang sehipisini yaxshi püttürüsh kérek," dégen.

Uning sözige qarighanda, Uyghur élidiki partiye ezaliri we kadirlar muddetke we türkümge bölünüp mexsus qurultay rohi boyiche terbyelinidiken. Qurultay rohi Uyghur élining jay-jayliridiki karxanilar, yéza-kentler, organlar, mektepler we mehellilerde léksiye sözlesh yaki taratqularning wasitisi arqiliq keng teshwiq qilinidiken.

Chet'ellerdiki közetküchiler, Uyghur diyarini qattiq qolluq bilen idare qilghanliqi üchün bu qétimliq qurultayda shi jinping teripidin "Tartuqlan'ghan" chén chüen'goning bundin kéyin Uyghur élini téximu qattiq tedbirler bilen idare qilidighanliqini mölcherlimekte.

Chén chüen'goning xitay kompartiyesining siyasiy byuro ezaliqigha teyinlinishi Uyghur éli weziyitige yéqindin diqqet qilip kéliwatqan chet'ellik közetküchilerningmu diqqitini qozghidi. Ular tiwittérdiki inkaslirida "Bu xitay kompartiyisining qattiq qolluq bilen bashqurghuchilarni mukapatlaydighanliqining eng tipik bir misali," dep yazghan.

Toluq bet