Хитайниң «йәршари вақти гезити» дуня уйғур қурултийини қарилашқа урунди

Мухбиримиз ирадә
2020-03-18
Елхәт
Пикир
Share
Принт

Хитайниң «йәршари вақти гезити» йеқинда дуня уйғур қурултийиға һуҗум қилидиған бир парчә мақалә елан қилип, уйғур районида йүз бериватқан еғир кишилик һоқуқ паҗиәлирини инкар қилишқа урунди.

«Йәршари вақти гезити» 15-март күнидики мақалисидә «Grayzone» намлиқ тор бәттә аҗит сих намлиқ шәхс тәрипидин дуня уйғур қурултийи һәққидә йезилған бир парчә мақалини нәқил елип туруп, америкадики «демократийәни илгири сүрүш фонди» ниң малийә ярдимигә еришидиған дуня уйғур қурултийиниң американиң дөләт истихбарат идариси «CIA» ниң башқуруши астидики органлиқини, униң американиң буйруқиға бинаән хитайға қара чаплаш һәрикәтлирини йүргүзүп, уйғур елидә лагерлар вә башқа зулум сиясәтлири йүргүзүлүватқанлиқи һәққидә ялған тәшвиқат билән шуғулланғанлиқини илгири сүргән. Улар мақалисидә, җеңлияң исимлик бир хитай тәтқиқатчиниң сөзлирини нәқил кәлтүрүп туруп, америка дуня уйғур қурултийини қоллинип туруп, хитайни қамал астиға елиш мәқситигә йәтмәкчи болуватиду, дегән.

Хитайниң һөкүмәт авази болған «йәршари вақти гезити» йәнә, әркин асия радийосиниму дуня уйғур қурултийиға мунасивәтлик орган, дәп көрситип, ню-йорк вақти гезити қатарлиқ башқа хәлқаралиқ ахбаратларда лагерлар һәққидә чиққан хәвәрләрниму әркин асия радийоси тәминлигәнликини билдүргән вә бу арқилиқ юқиридики ахбаратларда елан қилинған пакитлик хәвәрләрни йоққа чиқиришқа урунған.

Юқиридики хитай тәшвиқат аппарати йәнә, «дуня уйғур қурултийиниң террорлуқ тәшкилатлар билән алақиси барлиқи» ни илгири сүрүш билән тәң, уйғур елидә барлиқ милләтләрниң хушал-хурам яшаватқанлиқини, хитайниң милләтләр сияситиниң интайин илғарлиқини илгири сүргән.

Хитай һөкүмитиниң уйғур елидә лагер түзүми вә шундақла мәҗбурий әмгәк түзүмини йолға қоюватқанлиқи һәққидә йеқиндин буян хәлқарадики мустәқил тәтқиқат органлири муһим доклатларни елан қилғандин кейин хитай һөкүмити хәлқарада күчлүк бесимға дуч кәлгәниди. Дуня уйғур қурултийи тивиттир арқилиқ «йәршари вақти» гезитигә қайтурған инкасида «хитай һөкүмити райондики инсанийәткә қарши йүргүзүватқан җинайәтлирини тохтитиш орниға дуня уйғур қурултийиға һуҗум қилмақта. Инсанларниң һаяти бәдилигә өзиниң абруйини қоғдашқа урунмақта» деди.

Пикирләр (0)
Share
Толуқ бәт