Xangjuda ötküzülüsh aldida turghan 20 dölet guruhi bashliqliri yighini xitay terepni teshwishke salmaqtiken

Melum bolushiche, xangjuda ötküzülüsh aldida turghan 20 dölet guruhi bashliqliri yighini harpisida xitay hökümitining endishiliri köpeymektiken.

Roytérs agéntliqining bildürüshiche, ötken heptining axiri xitay terep xangjuda ötküzülidighan 20 dölet guruhi bashliqliri yighinidin paydilinip, bashqilargha özining yer sharidiki derijidin tashqiri chong döletlik ornini étirap qildurushni ümid qilghan.

Béyjingdiki chet'el diplomatlirining roytérs agéntliqigha bildürüshiche, xitay yene bu pursette özining jenubiy déngiz majirasi bilen soda muhapizet pilani mesiliside bashqilargha “Gépini ötküzeleydighan” imtiyazgha érishishni ümid qilghan iken.

Halbuki, xangjudiki uchrishish yéqinlashqanséri xitayning bu heqte soqqan diplomatik chotliridin yochuq échilip, gherb ellirining pozitsiyisidin barghanséri teshwishlenmektiken.

Béyjingdiki merkiziy partiye mektipining “Öginish” gézitining obzorchisi 8 - ayning otturiliri bu heqte obzor maqalisi élan qilip, “Amérika teshebbus qiliwatqan tinch okyan halqighan istratégiyilik shériklik ehdinamisi emeliyette junggoning qed kötürüshini chetke qaqidu shundaqla junggoning dunya sehnisidiki heq qilghuch pikir hoquqini inkar qilidu,” deydu.

Mezkur obzorchi maqaliside yene “Ular yer sharini idare qilish hoquqini monopul qiliwélishni oylaydu. Atalmish "muqeddes ittipaq" berpa qilip, dunyaning yéngi siyasiy tertipini qayta belgileshni, junggoni bu yéngi tertiptin siqip chiqirishni meqset qilidu,” dep yazidu.

Közetküchiler, gerche xitay özini amérikidin qalsila dunyadiki 2 - nomurluq zor küch dep qarisimu, emma hazirgha qeder özide bu hökümni jezimleshtüreleydighan ishenchining téxi turghuzulmighanliqini ilgiri sürmekte.

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar