“мәҗбурий ғайиб қиливетилгәнләр хәлқара күни” дә уйғур ғайиблар мәсилиси оттуриға қоюлди

Мухбиримиз әзиз
2017.08.29

Бирләшкән дөләтләр тәшкилати 2010-йилидин буян һәр йилиниң 30-авғуст күнини “мәҗбурий ғайиб қиливетилгәнләр хатирә күни” дәп бекиткән болуп, бу хатирә күндә дуняниң һәрқайси җайлиридики диктатор һакимийәтләр зорлуқ васитиси арқилиқ ғайиб қиливәткән инсанлар алаһидә әсләп өтүлиду.

Вашингтон шәһиридики “уйғур инсан һәқлири қурулуши тәшкилати” бу мунасивәт билән баянат елан қилди. Баянатта хитай һөкүмитидин 2009-йилидики үрүмчи “5-июл вәқәси” дин кейин ғайиб болған уйғурларниң һәмдә бу йил июл ейида мисирда қолға елинип мәҗбурий йосунда хитайға қайтурулған уйғур оқуғучиларниң из-дерики җиддий соралди.

Тәшкилатниң мудири өмәр қанат баянатта “бир дөләтниң шәхсләрни ғайиб қиливетиши инсан һәқлирини пайхан қилишниң әң юқири пәллисиниң бири. Хитай өзиниң бу қилмишини етирап қилиши, шуниңдәк буниң қурбанлири һәмдә уларниң аилә-тавабиатлириға мунасип төләм төлиши лазим” дегән.

Баянатта уйғурлар дияридики ғайиб қиливетилгәнләрдин бир қисим кишиләрниң исми берилгән болуп, “инсан һәқлирини көзитиш тәшкилати” буни ғайиб болған уйғурлардин “пәқәт азғинә бир топ киши” дәп көрсәткән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.