خىتاي ھۆكۈمىتى ئۇيغۇر كانادا پۇقراسى ھۈسەنجان جېلىلنى تۈرمىدىن قويۇپ بېرىشكە چاقىرىلدى

مۇخبىرىمىز ئەركىن
2022-03-28
Share

كانادانىڭ سابىق ۋە ھازىرقى پارلامېنت ئەزالىرى، كىشىلىك ھوقۇق پائالىيەتچىلىرى ۋە سابىق دىپلوماتلىرىدىن بولۇپ 20 دىن ئارتۇق كىشى خىتاي تاشقى ئىشلار مىنىستىرى ۋاڭ يىغا خەت يېزىپ، 16 يىلدىن بېرى خىتاي تۈرمىسىدە ناھەق يېتىۋاتقان ئۇيغۇر كانادا پۇقراسى ھۈسەنجان جېلىلنى قويۇپ بېرىشكە چاقىرغان. مەزكۇر خەت كانادا-خىتاي ئارىسىدىكى ئۇزۇن يىللىق دىپلوماتىك سۈركىلىش پەيدا قىلغان ھۈسەنجان جېلىلنىڭ تۇتقۇن قىلىنىشىغا 16 يىل تولغان بىر ۋاقىتتا يېزىلغان.

كانادادىكى «يەرشارى ۋە پوچتا» گېزىتىنىڭ خەۋەر قىلىشىچە، مەزكۇر خەتكە ئىمزا قويغۇچىلار كانادانىڭ ئىرۋىن كوتلېر، ئاللەن روك، پېتېر مېككاي، لاۋرېنس كاننون قاتارلىق تۆت نەپەر سابىق ھۆكۈمەت مىنىستىرىنىمۇ ئ‍ۆز ئىچىگە ئالغان. 27-مارت كۈنى يېزىلغان خەتتە، ھۈسەنجان جېلىلنىڭ تەقدىرىگە دائىر خەۋەرلەرنىڭ بۇنىڭدىن 6 يىل ئاۋۋال پۈتۈنلەي كېسىلگەنلىكى، «2016-يىلدىن بېرى ئۇنىڭ قەيەردە ئىكەنلىكى، ھازىرقى سالاھىيىتى ۋە سالامەتلىك ئەھۋالى توغرىسىدا ھېچكىمنىڭ خەۋەر ئاڭلاپ باقمىغانلىقى» تەكىتلەنگەن.

ھۈسەنجان جېلىل 2006-يىلى ئۆزبېكىستانغا تۇغقان يوقلاشقا بارغاندا ئۆزبېكىستان ھۆكۈمىتى تەرىپىدىن تۇتقۇن قىلىنىپ، خىتايغا ئۆتكۈزۈپ بېرىلگەن. خىتاي ھۆكۈمىتى ئۇنىڭغا «تېررورچىلىق» بىلەن ئەيىبلەپ ئۆلۈم جازاسى بېرىپ، 2014-يىلى مۇددەتسىز قاماققا ئۆزگەرتكەن. 2018-يىلى ئۇنىڭ مۇددەتسىز قاماق جازاسى 20 يىلغا قىسقارتىلغانىدى.

بۇ جەرياندا خىتاي ئۇنىڭ كانادا پۇقراسى ئىكەنلىكىنى رەت قىلىپ، كانادا دىپلوماتلىرىنىڭ ئۇنىڭ بىلەن كۆرۈشۈشىگە يول قويمىغانىدى. «يەرشارى ۋە پوچتا» گېزىتىنىڭ ئېيتىشىچە، خەتتە ھۈسەنجان جېلىلنىڭ قويۇپ بېرىلگەندە 70 ياشقا يېقىنلىشىدىغانلىقى ۋە كىچىك ئوغلىنى كۆرۈپ باقمىغانلىقى ئەسكەرتىلىپ، «قانداق بولۇشىدىن قەتئىينەزەر، ھۆكۈمىتىڭىز ھۈسەنجان جېلىلنى داۋاملىق قاماپ…. . ئۇنىڭ ھوقۇقىنى رەت قىلىپ كەلدى. بۇنداق قىلىش ئارقىلىق ھۆكۈمىتىڭىز ئۆزىنىڭ ئىچكى قانۇنى، ئاساسى قانۇنى، شۇنداقلا خەلقئارا قانۇن ۋە ئۆلچەملەردىكى پىكىر ئەركىنلىكى، دىنىي ئەركىنلىك، ھەق-ھوقۇققا مۇناسىۋەتلىك قائىدە-تۈزۈملەرگە كۆز يۇمدى» دېيىلگەن. مەلۇم بولۇشىچە، كانادانىڭ لىبېرال پارلامېنت ئەزالىرى ئۆتكەن ھەپتە تاشقى ئىشلار مىنىستىرى مېلانې جولېيدىن ھەسەنجان جېلىلنىڭ دېلوسى ئۈچۈن ئالاھىدە ۋەكىل تەيىنلەشنى تەلەپ قىلغان.

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت