Uyghur ziyaliysi ilham toxti 54 yashliq tughulghan künini yene türmide kütüwaldi
2023.10.26
25-Öktebir küni, xitayda muddetsiz qamaq jazasigha höküm qilin'ghan, xitay merkizi milletler uniwérsitétining sabiq dotsénti ilham toxtining tughulghan küni munasiwiti bilen uni xatirilesh muhakime yighini ötküzülgen.
Gérmaniyediki “Ilham toxtini qollash guruppisi” orunlashturghan bu tor söhbet yighinigha yawropa ittipaqining bir qisim parlamént ezaliri, kishilik hoquq qurulushlirining wekilliri qatniship söz qilghan.
Ilham toxti bu yil 54 yashqa kirgen bolup, bu uning türmide kütüwalghan 9-qétimliq tughulghan küni bolup hésablinidu. Ilham toxti muddetsiz késilgendin kéyin üch yilghiche bolghan ariliqta yeni 2014-yilidin 2017-yilighiche ilham toxtining a'ilisidikiler uning bilen her 3 ayda bir qétim körüsheligen bolsimu, biraq 2017-yilidin kéyin bundaq körüshüshler pütünley toxtitilghan. Shundin béri ilham toxtining ehwali, salametliki hetta hayat bolup-bolmighanliqimu namelum turmaqta.
Chet'ellerdiki kishilik hoquq terepdarliri ilham toxtining tughulghan künide xitay hökümitidin ilham toxtining aqiwiti heqqide melumat bérish, uni qoyuwétish chaqiriqlirini qayta otturigha qoydi.