Америка санаәтләшкән 7 дөләтни хитайниң иқтисади зораванлиқиға қарита ортақ һәрикәт қилишқа чақирған

Америка санаәтләшкән 7 дөләт гуруһини әгәр хитай бу гуруһниң әзалири вә униң шериклиригә қарита иқтисадий зораванлиқ қилса, униңға қарита ортақ һәрикәт елип беришни тәләп қилған. японийәдә чиқидиған “никий асия” тор журнилиниң хәвәр қилишичә, нөвәттә америка санаәтләшкән 7 дөләт гуруһиниң әзалиридин канада, әнглийә, фирансийә, японийә, италийә, германийә вә бу гуруһниң шериклиридин явропа иттипақини ортақ тәдбир елишқа һәрикәтләндүрмәктикән.

Хәвәрдә йәнә америка һөкүмити вә дөләт мәҗлисиниң хитайниң иқтисадий зораванлиқиға қарита таможна беҗини өстүрүшни өз ичигә алған өч елиш характерлик тәдбирләрни елишни ашкарилиғанлиқи, бу тәдбирләр бейҗиңниң башқа дөләтләргә иқтисадий зораванлиқ қилишини чәкләшкә қаритилған, дәп қаралғанлиқи билдүрүлгән.

“никий асия” ниң ейтишичә, ортақ һәрикәтниң тәпсилати санаәтләшкән7 дөләтниң башлиқлар йиғини бу йил 5-айда ечилишидин бурун, мәзкур гуруһниң бу нөвәтлик рәис дөлити болған японийә билән музакирә қилинидикән. Хәвәрдә американиң ортақ һәрикәт қилиш мәсилидә японийә вә явропа иттипақиниң қоллишини тәләп қилғанлиқи билдүрүлгән. Мәлум болушичә, хитай, ковид-19 вирусиниң келиш мәнбәсини тәкшүрүшни, тәйвән билән мунасивәтни күчәйтишни яки уйғур ирқий қирғинчилиқини җавабкарлиққа тартишни тәләп қилған дөләтләргә қарита иқтисадий чәклимә қоюп, бу дөләтләрни ташқи сиясәттә ‍өзигә йол қоюшқа мәҗбурлап кәлгән.

“никий асия” ниң ейтишичә, американиң ортақ һәрикәт пилани хитайниң бу хил ‍иқтисадий зораванлиқиниң тәсиригә учриған дөләтләргә қарита таможна беҗини азайтиш, импорт маллириниң миқдарини көпәйтиш, бу арқилиқ хитай иқтисадий зораванлиқиниң тәсирини азайтиш қатарлиқларни өз ичигә алғаникән.