Вилям бровдер: «җаза лагерлирида җавабкарлиқи бар хитай әмәлдарлирини җазалаш керәк»

Мухбиримиз әркин
2019-09-30
Елхәт
Пикир
Share
Принт

2019‏-Йиллиқ «лантос кишилик һоқуқ мукапати» ниң лауриянти вилям бровдер 27‏-сентәбир күни америка дөләт мәҗлисидә өткүзүлгән мукапат тарқитиш мурасимида сөз қилип, американиң «магнетиски кишилик һоқуқ қануни» ни ишқа селип, уйғур районидики кишилик һоқуқни дәпсәндә қиливатқан хитай әмәлдарлирини җазалиши керәкликини билдүргән.

Вилям бровдер русийәлик адвокат сергей магнетискийниң намидики «магнитиски кишилик һоқуқ қануни» ниң 2012‏-йили дөләт мәҗлисидә оттуриға қоюлуши вә униң мақуллинишида түрткилик рол ойниған кишилик һоқуқ паалийәтчиси. «Йәр шари магнитиски кишилик һоқуқ қануни» америка һөкүмитиниң һәр қайси әлләрдики кишилик һоқуқ дәпсәндичиликини җазалишидики өткүр қорали, дәп қарилип кәлмәктә.

Вилям бровдер мукапат тарқитиш мурасимида мухбиримизниң алаһидә зияритини қобул қилип, уйғур районидики йиғивелиш лагерлириниң натсистларниң йәһудий җаза лагерлири билән һечқандақ пәрқи йоқлиғини билдүргән. У «нөвәттә хитай һөкүмитиниң уйғур хәлқигә қиливатқанлириниң натсистлар һакимийитиниң явропадики йәһудийларға қилғанлири билән һечқандақ пәрқи йоқ. Җаза лагерлири, қайта-тәрбийәләш лагерлири, қанунсиз өлтүрүш, тән җазаси, дегәнләр буниң җүмлисидур. Буниңда җавабкарлиқи бар кишиләргә ташқиридин ембарго қоймиғичә, хитайниң өз ичидин өзгириши бәк мүшкүл,» дегән.

Мурасимда йәнә «лантос кишилик һоқуқ фонди» ниң рәиси катрена лантос свет ханим, трамп һөкүмитиниң «магнетиски кишилик һоқуқ қануни» ни ишқа селип, «шәрқий түркистанда инсанийәткә қарши туруш җинайити» садир қиливатқан хитай әмәлдарлирини җазалашниң пәвқуладдә муһимлиқини тәкитлигән. Мәзкур районда дунядики әң қорқунчлуқ бигунаһ пуқраларни хорлаш қилмиши йүз бериватқанлиқини тәкитлигән катрина лантос ханим «биз хитай һөкүмитини җавабкарлиққа тартишимиз керәк» дегән.

«Лантос кишилик һоқуқ фонди» ниң билдүрүшичә, вилям бровдерниң наһәқчиликкә қарши адаләтни яқлаштәк тәврәнмәс роһи, «магнетиски кишилик һоқуқ қануни» ниң мақуллинишида ойниған роли сәвәблик 2019‏-йиллиқ «лантос кишилик һоқуқ мукапати» униңға лайиқ көрүлгән. 27‏-Сентәбирдики мукапат тарқитиш мурасимиға авам палата әзаси кристофир симит, җеймис микговерн вә сабиқ авам палата әзаси франк волф, рабийә қадир қатарлиқ кишиләр қатнашқан.

Пикирләр (0)
Share
Толуқ бәт