Amérikadiki Uyghur yashlar meshrep kulubi dölet mejliside "Uyghur qanun layihesi" heqqide pa'aliyet élip bardi

Muxbirimiz erkin
2019-06-05
Élxet
Pikir
Share
Print

Amérikadiki "Uyghur yashlar meshrep kulubi" namliq yashlar guruppisining 30 dek ezasi ötken hepte amérika dölet mejlisining awam we kéngesh palata ezalirini ziyaret qilip, ularni "Uyghur kishilik hoquq qanun layihesi" ni qollashqa we uni tézrek maqullashqa ündigen. Nöwette amérika dölet mejlisining awam we kéngesh palatalirida Uyghurlarning kishilik hoquqigha alaqidar ikki qanun layihesi maqullinishni kütüp turmaqta.

Mezkur qanun layihelirining biri yéqinda kéngesh palatasining tashqi ishlar komitétida awazgha qoyulup, birdek maqullan'ghan. Emma uning awam palatasidiki nusxisi téxi komitétlarning awaz bérishige qoyulmighanidi. "Amérika awazi radiyosi" ning xewer qilishiche, meshrep kulubining qurghuchisi behram sintash bashchiliqidiki yashlar awam we kéngesh palata ezalirining ishxanilirigha kirip, ulargha Uyghurlarning weziyiti we qanun layihesini tézrek maqullashning zörürlikini chüshendürgen.

U, amérikaning Uyghurlargha yardem qilishini ümid qilidighanliqini bildürüp, "Biz amérikaning öz Uyghurlar wetinide mewjutluqi ümidsiz kélechekke duch kéliwatqan bir waqittta Uyghurlar üchün des turushini ümid qilimiz. . . . . . . Men ziyankeshlikke uchrighan bir a'ilining ezasi. Méning dadam jaza lagérlirida tutup turulmaqta" dégen. Behram sintashning dadisi qurban mamut "Shinjang mediniyiti" zhornilining bash muherriri bolup, u 2018‏-yilning bashlirida lagirgha élip kétilgen idi.

Behram sintash "Amérika awazi radiyosi" ning muxbirigha qilghan sözide yene, "Biz awazsizlarning awazi bolushni isteymiz. Uyghurlar yardemge bolupmu, amérikaliqlarning yardimige éhtiyajliq" dégen. Uning bildürüshiche, ular körüshken dölet mejlisining xéli köp ezaliri Uyghur kishilik hoquq qanun layihesini qollaydighanliqini ipadiligen.

Xewerde yene kishilik hoquq közitish teshkilati asiya bölümining diréktori sofiye richardsonning sözi neqil keltürülgen. Sofiye richardson Uyghur kishilik hoquq qanun layihesining "Pewqul'adde" we "Tarixiy xaraktérlik" ehmiyiti barliqini tekitlep, uning köp qirliq qanun layihesi ikenliki, uning Uyghur muhajirlirini qoghdashtin tartip, xitay karxalirini we emeldarlirini jazalashqiche bolghan köp xil sahelerge chétilidighanliqini bildürgen.

Toluq bet