Трамп һөкүмити асия NATO си қуруп, хитайға тақабил турушни ойлашмақта икән

Мухбиримиз әркин
2020-10-05
Елхәт
Пикир
Share
Принт

Трамп һөкүмити асиядики дөләтләр билән шимали атлантик әһди тәшкилатиға охшаш бир һәрбий-сияси иттипақ қуруп, хитайға тақабил турушни ойлашмақта икән.

«Вашингтон вақти» гезити трамп һөкүмитидики әмәлдарларниң буниң үчүн үн-түнсиз һәрикәт қиливатқанлиқини билдүргән. Хәвәрдә тәкитлишичә, бу пикирни алди билән американиң муавин ташқи ишлар министири стефен бейгун алдинқи айда америка, австралийә, һиндистан вә японийә «4 дөләт гуруһи» ниң ғәйрий-рәсмий иттипақи һәққидики бир сөзидә ашкарилиған.

Стефен бәйгун 31-авғуст күни өткүзүлгән «америка-һиндистан истратегийәлик диялоги» намлиқ йиғинда қилған сөзидә: «бу трамп һөкүмитиниң 2-қарар вәзипә өтәш муддити ичидә яки у сайлиналмиған тәқдирдиму, кейинки президент өзиниң 1-қарар вәзипә өтәш муддити ичидә җиддий ойлишидиған мәсилә болиду,» дегән. «Вашингтон вақти» гезитиниң хәвиридә мутәхәссисләрниң «һәрбий иттипақ қуруш, болупму һиндистан билән австралийә хитайниң дүшмәнликигә дуч кәлгән бир пәйттә һәрқандақ вақиттикидинму еһтияҗлиқ мәсилә болуп қалди,» дәп қарайдиғанлиқи тәкитләнгән.

Бу тоғрисида «вилсон мәркизи» асия программисиниң муавин директори майкел кугелман мундақ дегән: «нөвәттә ‹4 дөләт гуруһи' вә шундақла райондики башқа дөләтләрдиму хитайниң һәрикитиниң таҗавузчилиқ болупла қалмай, йәр шариниң муқумлиқиғиму тәһдит селиватқанлиқи тоғрисида ортақ тонуш күчәймәктә.»

«Вашингтон вақти» гезитиниң тәкитлишичә, йеқинқи айларда хитайниң хириси күчәйгәнсери «һинди-тинч окян иттипақи» қуруш американиң күнтәртипидики асаслиқ мәсилигә айланған.

Пикирләр (0)
Share
Толуқ бәт