Лагерға елип кетилгән язғучи нурмәмәт тохтиниң җәситиниң аилисигә тапшуруп берилгәнлики илгири сүрүлди

Мухбиримиз әркин
2019-06-10
Share

Буниңдин тәхминән 70-80 күн аввал сақчиға елип кетилгән хотәнлик язғучи нурмәмәт тохтиниң җәситиниң йеқинда аилисигә тапшуруп берилгәнлики илгири сүрүлди. Чәтәлдики вәқәдин хәвәрдар затларниң иҗтимаий таратқуларда елан қилишичә, нурмәмәт тохтиниң җәсити 6‏-айниң башлирида аилисигә тапшуруп берилгән. Учурда, униң вапат болуштин тәхминән 70 күн бурун йәни 4‏-айниң оттурилирида "сорайдиған гәп бар" дегән баһанә билән сақчиға елип кетилгәнлики, у елип кетилгән күнила кесили қозғилип қалғанлиқи, лекин "дохтурниң тәкшүрүшигә нөвәт тәгмәй 70 күн сақлиғанлиқи" илгири сүрүлгән.

Нөвәттә, нурмәмәт тохтиниң сақчиға елип кетилиш сәвәби, у таяқ зәрбисидә вапат болдиму яки кесили қозғилип вапат болдиму, бу һәқтики тәпсилатлар бизгә намәлум. Бу һәқтики тәпсилатлар техи йәрлик даириләр тәрипидин дәлилләнмиди. У һазирға қәдәр тутқунда өлгәнлики илгири сүрүлгән, лекин өлүмигә аит тәпсилатлар толуқ ашкариланмиған нурғун уйғур әдиблириниң биридур. 

Уйғур кишилик һоқуқ тәшкилатлириниң илгири сүрүшичә, хитай һөкүмити 2017‏-йили 2‏-айдин башлап уйғурларни кәң көләмлик тутқун қилип, 2 милйондәк кишини йиғивелиш лагерлириға қамаш һәрикитидә уйғур язғучилар, сәнәтчиләр, тилшунаслар, тарихшунаслар вә әдәбиятчилар униң асаслиқ тутқун қилиш нишанлириниң биригә айланған. 

1949‏-Йили хотән наһийисиниң тәвәккүл йезисида туғулған нурмәмәт тохти, уйғур һазирқи заман әдәбиятидики йетүк язғучиларниң бири иди. Мәлум болушичә, у 1984‏-йили хотән "қаштеши" журнилида елан қилинған "бойтақ һәққидә хатириләр" намлиқ әсири билән иҗадийәт сепигә кирип кәлгән. У "у дунядики сорақ", "бәш түп сөгәт", "аҗайип кәспий аилә", "шаһ мәшрәп хотәндә", "6 күнлүк падишаһ" қатарлиқ һекайә, повестлирини елан а қилип, җәмийәттә күчлүк инкас қозғиғаниди. 

Иҗтимаий таратқулардики учурларда қәйт қилинишичә, "мәрһум лагерда яки лагердикиләр қамалған бирәр дохтурханида қаза қилғанлиқи яки сорақ җәрянида өлүп кәткәнлики ениқ әмәскән".

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт