Хитайниң йәр асти банкилири торда пул ююш билән шуғулланмақтикән

Вашингтондин мухбиримиз җәвлан тәйярлиди
2024.04.24

Хитайдики бәзи йәр асти банкилар пул ююш билән шуғуллиниватқан болуп, улар дөләт һалқиған җинайәт гуруһлириниң әң башта таллайдиған пул-муамилә докари болуп қалған.

“иқтисадшунас” ториниң 22-апрел бәргән хәвиридә дейилишичә, америка ташқи ишлар министири антони билинкен бейҗиң вә шаңхәйдә елип баридиған 3 күнлүк зиярити давамида хитай һөкүмитидин русийәгә һәрбий қорал вә хам әшя тәминләшни тохтитишни тәләп қилиш билән биргә, пул ююш қилмишлириға зәрбә беришни тәләп қилидикән.

Хәвәрдә ейтилишичә, йеқинқи йиллардин буян хитайниң йәр асти интернет алақиси вә йеңи тор техникисиниң ярдими билән пул ююш қилмишлири еғирлашқан болуп, пул ююш мәшғулатини бир нәччә минут ичидила тамамлайдиған һаләт шәкилләнгән. Дуняниң һәр қайси җайлиридики хәлқара җинайәт гуруһлири бу имканийәттин пайдилинип кәлгән; шундақ қилип, хитайниң йәр асти банкилири уларни пул-муамилә мулазимити тәминләйдиған әң чоң банкерлар болуп қалған. Уларни бастуруш америка билән хитайниң дөләт дәриҗилик сөһбитидики муһим темилардин биригә айланған.

Хәвәрдә көрситилишичә, 2023-йилдин 11-айдин 12-айғичә америкада фентанил билән өлгән адәм 105 миңға йәткән болуп, мексикадин киридиған бу зәһәрниң содиси хәлқара җинайәт гуруһлириниң қолида икән, һалбуки, хитайниң йәр асти банкилири бу ишта һәл қилғуч рол ойнимақта икән. Униңдин башқа, асия җинайәт гуруһи, болупму хитай җинайәт гуруһи явропағиму тәһдит шәкилләндүргән, уларниң җинайити қимардин тартип зәһәр содиси вә биткойинғичә четилидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.