Нюйорк вақти гезити мухбири қәшқәрдә сақчиларниң тәқибигә учриған

Мухбиримиз ирадә
2017-07-20
Елхәт
Пикир
Share
Принт

Чаршәнбә күни америкидики нопузлуқ гезит болған нюйорк вақти гезити мухбириниң қәшқәрдики зияритигә асасән язған бир парчә мақалиси елан қилинди.

Бу хәвәр мақалисигә, «йипәк йолидики йешилзарлиқ қәшқәрдә хитай сақчисидин қечиш» дәп мавзу қоюлған болуп, мухбир мақалисидә қәшқәрдики еғир тәқиб вә қаттиқ бихәтәрлик тәдбирлири үстидә алаһидә тохталған.

Мухбир едвард ваңниң баян қилишичә, бу униң қәшқәрни 1999-йилидин бери 5-қетим зиярәт қилиши болуп, у бу қетим өзиниң қәшқәрдә илгирики йилларға қариғанда техиму көп сақчи, пуқрачә кийингән сақчи вә һәр коча бешида турған «қулайлиқ сақчи понкитлири» ни көргәнликини шундақла һәммила йәрдә есилип турған бихәтәрлик камералирини көрүп һәйран қалғанлиқини баян қилған.

Униң ейтишичә, у илгирики зиярәтлиридә өзигә әгишивалған пуқрачә кийингән сақчиларни байқимиған икән, бирақ бу нөвәт меһманханидин чиқар-чиқмайла бир нәпири уйғур, икки киши кәйнигә киривелип, нәгила барса тәқиб қилған һәтта уни агаһландуруп «сақчи вә һәрбийләрни рәсимгә тартишиңға болмайду» дегән. У сақчи йәнә мухбирға «биз сени давамлиқ көзитип туримиз, чүнки қәшқәр чәтәлликләр үчүн бихәтәр әмәс, бу сениң бихәтәрликиң үчүн» дегән. Едвард ваң мақалисидә бу һәқтә тохтилип «ирақтики уруш мәзгилидә 3 йерим йил мухбирлиқ қилған бири болуш сүпитим билән неминиң хәтәрликликини биләттим, әмма мән шинҗаңниң һечқандақ йеридә өзүмни хәтәрдә һес қилмиған идим» дегән.

Едвард ваң хәвири давамида, чәтәллик мутәхәссисләрниң сөзини нәқил елип туруп, чен чүәнго уйғур ели партком секретари болуп кәлгәндин бери, уйғур елини сақчи дөлити системиси билән башқуруватқанлиқини баян қилған.

Уйғур елидики мислисиз бихәтәрлик тәдбирлири хәлқарадики көзәткүчиләрниң диққитини қозғаватқан болуп, техи йеқинда фирансийә агентлиқи мухбириниң уйғур елини зиярәт қилип язған мақалиси күчлүк тәсир пәйда қилған иди.

Пикирләр (0)
Share
Толуқ бәт