Уйғур елидики наһийәләр давамлиқ сақчи қобул қилмақта

Мухбиримиз ирадә
2019-02-01
Елхәт
Пикир
Share
Принт

Хитай даирилириниң уйғур елиниң һәрқайси йеза-базарлириға йәнә көпләп сақчи хадими қобул қиливатқанлиқи мәлум.

1-Феврал күни, лопнур наһийәлик һөкүмәт тор бетидә лопнур наһийәсидики һәрқайси қулайлиқ сақчи понкитлири вә тәкшүрүш-чарлаш бекәтлириниң хизмитини күчәйтиш мәқситидә йәнә 200 нәпәр сақчи хадими қобул қилидиғанлиқи һәққидә уқтуруш чиқарған.

Лопнур наһийәлик һөкүмәт йәнә, наһийәниң тәптиш идарисигә җәмийәттин 7 нәпәр пүтүкчи қобул қилидиған болуп, уқтурушта илтимас қилғучиларниң дөләтниң сиясәтлирини чин дилидин қоллайдиған болуши шәрт қилинип, илтимас қилғучилар әгәр дөләтниң бирлики, милләтләр иттипақлиқини, муқимлиқни қоғдаш сиясәтлирини қизғинлиқ билән һимайә қилмиса вә илгири бөлгүнчилик һәрикәтлиригә, қанунсиз дини паалийәтләргә қатнашқан болса илтимасиниң қобул қилинмайдиғанлиқи әскәртилгән.

1-Феврал күни йәнә, корла шәһәрлик һөкүмәт ишханисиму уқтуруш елан қилип, корлидики аталмиш «аммиға қулайлиқ сақчи понкитлири» үчүн җәмийәттин 200 нәпәр сақчи хадими қобул қилидиғанлиқини җакарлиған.

Хитай даирилири уйғур елидә икки милйонғичә болған уйғур вә башқа йәрлик милләтләрни «қайта тәрбийәләш лагерлири» ға солап, районда аллиқачан юқири бесимлиқ сиясәт йүргүзүватқан бир шараитта йәнә тохтимай сақчи вә бихәтәрлик хадимлирини сәплиши диққәт қозғимақта.

Техи йеқинда йопурға наһийәлик җ х идариси хитай өлкилиридин наһийәгә 200 нәпәр кәспий хадим қобул қилидиғанлиқини елан қилған иди. Америкидики «җеймис товен фонди җәмийити» намлиқ тәтқиқат оргининиң өткән йили ноябирда елан қилинған доклатида көрситилишичә, хитайниң 2017‏-йили уйғур аптоном районида бихәтәрликкә алақидар қурулушларға сәрп қилған пули 3 һәссә артқан.

Пикирләр (0)
Share
Толуқ бәт