Кеңәш палата әзаси хавлейниң ши җинпиңни җавабкарлиққа тартиш қанун лайиһәси хитайниң қаттиқ инкасини қозғиған

Америка җумһурийәтчи кеңәш палата әзаси җош хавлейниң ‍өткән һәптә оттуриға қойған уйғур ирқий қирғинчилиқида хитай рәһбири ши җинпиңни җавабкарлиққа тартиш қанун лайиһәси, хитайниң дипломатик қаидә-йосунлардин һалқиған қаттиқ инкасини қозғиған.

“оксиос” ториниң хәвәр қилишичә, җош ховлейниң өткән һәптә сунған қанун лайиһәсидә, уйғурларға йүргүзүлгән ирқий қирғинчилиқта ши җинпиң вә униң юқири дәриҗилик әмәлдарлириниң биваситә җавабкарлиқи барлиқини муәййәнләштүрүш тәкитләнгән.

Хитайниң америкада турушлуқ әлчиханиси кеңәш палата әзаси хавлейға елхәт йезип, униң сунған ши җинпиңға ембарго йүргүзүш һәққидики қанун лайиһәсини әйиблигән.

Җош хавлейниң қанун лайиһәси хитай компартийәсиниң өткән йәкшәнбә күни ахирлашқан 20-қурултийида ши җинпиң қаидини бузуп, 3-нөвәт хитай компартийәсиниң баш секретарлиқиға бекитилгән, шундақла униңға садиқ кишиләрдин йеңи сиясий бюро даимий комитети тәшкиллигән бир вақитта сунулғаниди.

“оксиос” ниң хәвиридә ейтилишичә, хитай әлчиханисиниң 24-өктәбир йоллиған 800 сөзлүк хетидә, мәзкур қанун лайиһәси ғәзәп билән “тәкәббурлуқ вә пәскәшлик” дәп әйибләнгән.

Хәвәрдә, хитай әлчиханисиниң хети униң американиң ембаргосиға қанчилик сәзгүр икәнликини намаян қилғанлиқи, шундақла бу қанун лайиһәси әгәр келәр айдики оттура мәзгиллик сайламда җумһурийәтчиләр дөләт мәҗлисини контрол қилса, америка-хитай оттурисида йеңи җиддийчиликниң шәписини беридиғанлиқи тәкитләнгән.

“‍оксиос” ниң билдүрүшичә, хитай әлчиханиси хетидә, җош хавлейниң хитайға қарши соғуқ уруши тәпәккури вә идеологийәлик бир тәрәплимиликтин ваз кечип, хитай компартийәси вә һөкүмитиниң “шинҗаң сияситигә тоғра қариши”, бу қанунни тохтитиши, хитай компартийәси вә хитай рәһбәрлиригә һуҗум қилишни тохтитишини тәләп қилған.