Хитай хәлқ қурултийиниң "шинҗаң вәкилләр өмики" мәркәзниң орунлаштурушини "толуқ орундайдиғанлиқи" ни билдүргән

Мухбиримиз әркин
2021-03-05
Share

Хитай мәмликәтлик хәлқ қурултийиниң йиллиқ йиғини 5-март күни бейҗиңда башланған. Бу нөвәтлик йиғин хитай һөкүмити америка, канада, голландийә қатарлиқ дөләтләр тәрипидин уйғурларға "ирқий қирғинчилиқ" қилиш билән әйибләнгән, шуниңдәк хәлқарада хитай "ирқий қирғинчилиқ" ни тохтатмиса, 2022-йилиқ бейҗиң қишлиқ олимпикини байқут қилиш, хитайни җазалаш тоғрисидики чақириқларға күнсери әвҗигә чиқиватқан һалқилиқ бир мәзгилдә чақирилған.

Хитай таратқулириниң хәвәр қилишичә, хитай хәлқ қурултийиниң йиғинға қатнишидиған "шинҗаң вәкилләр өмики" 4-март бейҗиңда гуруппа йиғини өткүзүп, хитайниң "шинҗаң сиясити" ниң өзгәрмәйдиғанлиқидин сигнал бәргән. Йиғин вәкиллири хитай компартийәси мәркизи комитетниң "қарар вә орунлаштурушлирини толуқ орундайдиғанлиқи" ни билдүргән. "тәңритағ тори" ниң 5-март бәргән хәвиридә билдүрүшичә, уйғур аптоном районлуқ парткомниң секритари чен чүәнго "шинҗаң вәкилләр өмики" ниң башлиқи, шөһрәт закир билән шавкәт имин муавин башлиқи болуп йиғинға қатнашқан.

Йиғинда чен чүәнго сөз қилип, "шинҗаң вәкилләр өмики" ниң "идийә, сиясий вә һәрикәт җәһәттә ши җинпиң ядролуқидики партийә мәркизи комитети билән йүксәк дәриҗидә бирдәкликни сақлайдиғанлиқи", "йүксәк сиясий, тарихий мәсулийәт туйғуси билән партийә мәркизи комитетиниң қарарлири вә орунлаштурушлирини толуқ орундайдиғанлиқи" ни тәкитлигән. BBC Ниң хәвәр қилишичә, 5-март башланған йиғинда хитай баш министири ли кечяң хизмәт доклат берип, хоңкоңниң сайлам системисини өзгәртидиғанлиқини елан қилған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт