Талибанлар һакимийити хитайниң ярдими арқилиқ хәлқараниң етирап қилишиға еришишни истимәктә

Мухбиримиз әзиз
2022.01.18
Share on WhatsApp
Share on WhatsApp

2021-Йили талибанлар йеңиваштин афғанистан һакимийитини қолға алған болсиму, һазирға қәдәр дуня миқясида бирму дөләт бу һакимийәтни етирап қилмиған. Нәтиҗидә афғанистан һөкүмитиниң чәт әл банкилиридики тоңлитиветилгән тоққуз милярд америка доллиридин көпрәк мәблиғи талибанлар һакимийити үчүн “қол йәтмәс шаптул” ға айлинип қалған.

“блумберг хәвәрлири” ниң 17-январдики хәвиридә ейтилишичә, талибанлар һакимийити нөвәттики иқтисадий қийинчилиқни түгитиш үчүн сабиқ афғанистан һөкүмитиниң чәтәл банка һесаватидики мәблиғини қолға елишқа алдиримақта икән. Әмма талибанларниң терорлуқ билән бағлинишлиқ арқа көрүнүши түпәйлидин һечким бу һакимийәтни етирап қилмиғачқа, һечқайси банка бу пулни талибанлар һакимийитигә берәлмәйдикән. Йәнә келип талибанлар һакимийитидики бир қисим юқури дәриҗилик министирлар, җүмлидин мувәққәт ички ишлар министири сираҗидин һәққани қатарлиқлар техичә федератип тәкшүрүш идариси (FBI) ниң қара тизимликидә икән.

Хәвәрдә ейтилишичә, хитай ташқи ишлар министири ваң йи 15-январда талибанлар һакимийити билән бу һәқтә сөзләшкәндә, улар хитай һөкүмитиниң оттуриға чиқип, хәлқарада талибанлар һакимийитини етирап қилишқа йол ечиш һәққидә ярдәм сориған. Ваң йи бу һәқтә сөз қилип: “америка һөкүмити иқтисадий җаза арқилиқ афғанистандин өч алмаслиқи керәк,” дегән.

Мәлум болушичә, афғанистандики иқтисадий қәһәтчилик шу дәриҗигә йәткәнки, сабиқ афғанистан һөкүмитиниң бейҗиңдики баш әлчиси җавид әһмәд қайим уда йерим йилғичә афғанистандин муаш пули кәлмигәнликтин 2022-йили январниң бешида хизмәттин истипа бәргәнликини җакарлиған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт