Tayland saqchi da'iriliri bangkoktiki partlashqa chétishliq jinayet gumandarining taylandqa qanunsiz yollar arqiliq kirgenlikini éytqan

Muxbirimiz irade
2015-09-10
Élxet
Pikir
Share
Print

Tayland da'iriliri bügün bangkoktiki partlashqa chétishliq, dep élan qilghan jinayet gumandarliridin biri bolghan "Abduraxman abdusattar" isimlik kishining xitay pasporti barliqini, uning weqedin bir kün burun taylandtin ayrilip, bén'gal arqiliq xitaygha qaytip ketkenlikini jakarlidi.

Tayland saqchi da'iriliri yene qolgha élin'ghan ikki kishidin biri bolghan "Adem karadag" ning taylandqa qanunsiz yollar arqiliq kirgenlikini bildürgen. Tayland da'iriliri adem karadag isimlik bu gumandarning aldi bilen wiyétnam arqiliq taylandqa qoshna bolghan melum döletke yétip kelgenlikini, andin chégrada 600 dollar para bérish arqiliq qanunsiz halda taylandqa kirgenlikini bildürgen, biraq ular bu qoshna döletning ismini ashkarilimighan.

Tayland da'iriliri adem karadag isimlik bu gumandarning qolida türk pasporti barliqini bildürgen. U bangkoktiki partlashqa chétilip qolgha élin'ghan tunji kishi idi. Qolgha élin'ghanlarning yene biri, yüsüf mir'eli. Tayland da'iriliri aldinqi küni yüsüf mir'elining xitay pasporti barliqini we uningda kelgen yérining "Shinjang" dep yézilghanliqini élan qilghan.

Firansiye agéntliqining éytishiche, tayland saqchi da'iriliri peyshenbe küni bu ikki kishining pasportlirining rast-yalghanliqini éniqlash üchün pasport kopiyili'irini türkiye we xitayning alaqidar orunlirigha ewetip bergen. Xitay tashqi ishlar ministirliqining bayanatchisi xung léy bügünki bayanatida, tayland da'iriliri bilen bu délo üstide yéqindin hemkarlishiwatqanliqini, jinayetchilerning qattiq jazalinidighanliqini éytqan.

Chet'ellerdiki Uyghur közetküchiler taylandtiki bu délo heqqide élan qiliniwatqan uchurlarda gumanliq nuqtilarning köplükini bildürmekte.

Toluq bet