تىبەتلىكلەر سىچۈەندىكى بىر ئىبادەتخانىدا دالاي لامانىڭ رەسىمىنى چىقىرىپ دۇئا-تىلاۋەت ئۆتكۈزگەن

مۇخبىرىمىز شۆھرەت ھوشۇر
2016-01-29
Share

سىچۈەننىڭ گەنزى ناھىيىسىنىڭ چوكرى ئىبادەتخانىسىدا توپلانغان 1000دىن ئارتۇق تىبەتلىك بۇددىست، ئامېرىكىدا سالامەتلىك تەكشۈرۈشى ئېلىپ بېرىۋاتقان دىنىي داھىيسى دالاي لاماغا سالامەتلىك تىلەپ مۇشۇ ئاينىڭ25-ۋە26-كۈنلىرى مەخسۇس دۇئا-تىلاۋەت ئۆتكۈزگەن.

نەق مەيداندىن تارتىلغان سۈرەتتىن مەلۇم بولۇشىچە، ئۇلار بۇ تىلاۋەتنى ئىبادەتخانا سەھنىسىگە ئېسىلغان دالاي لامانىڭ رەسىمى ئالدىدا ئېلىپ بارغان.

رادىئومىزنىڭ بۈگۈنكى بۇ ھەقتىكى ئىنگلىزچە خەۋىرىدە بايان قىلىنىشىچە، ئادەتتە 13-يانۋاردىن 24‏-يانۋارغىچە تىبەت بۇددىستلىرىنىڭ يىللىق دۇئا-تىلاۋەت ھەپتىسى بولۇپ، تىبەتلەرنىڭ ھىندىستان دارامسالادىكى تەشكىلاتى نۆۋەتتە دوختۇرخانىدا تەكشۈرۈلۈۋاتقان دالاي لاماغا سالامەتلىك تىلەش ھەققىدە چاقىرىق چىقارغان ۋە دۇئا-تىلاۋەت ھەپتىسىنى ئىككى كۈن ئۇزارتىشنى تەشەببۇس قىلغان.

بۇ چاقىرىق ۋە تەشەببۇسقا ئاۋاز قوشقان سىچۈەندىكى تىبەتلەر مەزكۇر دۇئا-تىلاۋەت پائالىيىتىنى ئۆتكۈزگەن.

دارامسالادىكى تىبەت پائالىيەتچىلەرنىڭ بىلدۈرۈشىچە، سىچۈەندىكى بۇ دۇئا-تىلاۋەت پائالىيىتىگە خىتاي تەرەپ قول تىقىشقا پېتىنالمىغان ۋە ھازىرغىچە بۇ پائالىيەتكە قېتىلغانلارنىڭ جازالانغانلىقى ھەققىدە ھېچقانداق گەپ-سۆز كەلمىگەن.

سۈرگۈندىكى تىبەت ھۆكۈمىتى بۈگۈن بىر بايانات ئېلان قىلىپ، دالاي لامانىڭ سالامەتلىك تەكشۈرۈشىدە ئەندىشىلىنەرلىك بىر ئەھۋال كۆرۈلمىگەنلىكىنى بايان قىلغان.

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت