Фирансийә агентлиқи хитайниң "террорлуққа қарши" урушиниң қурбаниға айланған уйғур путболчилар һәққидә хәвәр тарқатти

Мухбиримиз ирадә
2018-09-06
Share

Фирансийә агентлиқи хитайдики һәрқайси путбол командилирида топ ойнайдиған, әмма ши җинпиңниң аталмиш "террорлуққа қарши" урушиниң зәрбисигә учраватқан уйғур путболчилар һәққидә бир мәхсус хәвәр тарқатти.

6-Сентәбир күни тарқитилған бу һәқтики хәвәрдә хитайниң дөләтлик командисиға кириш йолида илгириләватқан намзат мирәхмәтҗан музәппәр тонуштурулған. Хәвәрдә ейтилишичә, хитай һөкүмитиниң бир милйондин ошуқ уйғурни "йепиқ тәрбийә" лагерлириға қамиғанлиқи бирләшкән дөләтләр тәшкилати тәрипидин ениқ тилға елинип, хәлқара җәмийәтниң бу һәқтики әндишилири күчийиватқан бир мәзгилдә бу йил 27 яшқа киргән уйғур путболчи мирәхмәтҗан музәппәр хитай дөләт командисиниң теринери, италийәлик путбол чолпини марселло липпи тәрипидин командиға чақиртилған. Әгәр у талланған тәқдирдә үч күндин кейин қатар яки бәһрәйн билән өткүзүлидиған мусабиқидә хитай дөләт командисиниң топчиси сүпитидә мәйданға чүшидикән.

Хәвәрдә ейтилишичә, қәшқәрлик мирәхмәтҗан музәппәр тйәнҗин "теда" командисиниң оттура мәйдан топчиси болуп, у мушу һәптә ичидә хитайниң дөләт телевизийәси CCTV ниң зияритини қобул қилғанда марселло липпиниң өзини дөләт командисиға таллишини үмид қилидиғанлиқини, әгәр өзигә пурсәт берилсә, наһайити яхши нәтиҗә яритишқа капаләтлик қилидиғанлиқини ейтқан.

Фирансийә агентлиқиниң диққитини қозғиғини, хитайниң CCTV қанили программа бойичә мирәхмәнҗанниң миллитини тилға алмиған, пәқәт мирәхмәтҗан өзи "тез пүкмәслик шинҗаңлиқ топчиларниң қенида бар" дейиш арқилиқ өзиниң уйғурлуқидин пәхирлиниш туйғусини ипадә қилған.

Мирәхмәтҗанниң бу нөвәт дөләт командисиға чақиртилиши фирансийә агентлиқи мухбирлирида хитай һөкүмитиниң һазирқидәк бир шараитта дуняға "милләтләр иттипақлиқи" дегәнни намаян қилиш юқиридин чүшкән бир сиясий қарарму, дегән соални пәйда қилған. Улар буни "бипаян шәрқ путбулчилиқи" тор бетиниң бейҗиңда турушлуқ тәһрири брандон чемирстин сориған. Брандон чемирс бундақ бир еһтимални тамамән йоқ дегили болмисиму, әмма өзиниң липпи музәппәрниң қабилийитини өз көзи билән көрүшни арзу қилди дәп қарайдиғанлиқини ейтқан.

Фирансийә агентлиқи йәнә бу йил февралда ата-анисини йоқлап келиш үчүн юртиға қайтқанда лагерға елип кетилгән ерфанҗан һезимниму сүрүштүрүп, у илгири топ ойниған җеҗяң командиси билән алақиләшкән болсиму бир җаваб алалмиған. Униң рәсимиму команда әзалири арисидин өчүрүветилгән икән. Хәвәрдә "дөләт рәиси ши җинпиң гәрчә хитайниң путболчилиқтики тәқдирини өзгәртишкә тиришиватқан болсиму, әмма уйғур путболчилар хитайниң террорлуққа қарши туруш һәрикитидин аман қалмайватқанлиқи ениқ" дәп язған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт