Xitay bu yil Uyghur aptonom rayonining "Kespiy maharet terbiyesi" ge 700 milyondek pul salidiken

Muxbirimiz erkin
2020-01-17
Élxet
Pikir
Share
Print

Xitay hökümiti 2020‏-yili Uyghur rayonidiki "Kespiy terbiyelesh merkezliri" dep kéliwatqan kursantlirining "Kespiy maharet terbiyesi" ge 680 milyon yüen meblegh ajritip, 500 ming adem qétim "Kespiy terbiye" élip baridighanliqini élan qildi. "Tengritagh" torining 17‏-yanwar xewer qilishiche, da'iriler bu pulni Uyghur aptonom rayonining ishsizliq parawanliq fondidin teminleydiken. Bu xewer Uyghur aptonom rayoni da'irlirining Uyghur ishlemchilirini atalmish "Kespiy maharet merkezliri" de terbiyelep, xitay zawut-karxanilirida heqsiz yaki azraq ish heqqi bilen mejburi emgekke séliwatqanliqi we buningdin ghayet zor paydigha érishiwatqanliqi ilgiri sürülüwatqan mezgilde élan qilindi.

Yéqinda élan qilin'ghan bezi xewerlerde "Uyghur ishlemchiliri" mesilisining xitayda chong tijaretke aylan'ghanliqi, bezi xitay emgek mulazimet shirketlirining "Uyghur ishlemchiliri" ni torda ashkare bazargha séliwatqanliqi, buningda ularning Uyghur aptonom rayoni da'irliri bilen til biriktüriwalghanliqi tekitlen'gen. Bu heqtiki élanlarda Uyghur ishlemchilirining herbiy tüzüm bilen bashqurulidighanliqi, xalighanche kétip qalalmaydighanliqi, ish heqqining töwenliki we shundaqla saqchilarning nazaritide ishleydighanliqi ilgiri sürülgen. 

Xitay hökümiti bu ishlemchilerni namratliqtin qutulduriwatqanliqini ilgiri sürsimu, lékin uning bu siyasiti gherb döletlirining tenqidige uchrap kelgen. Amérika dölet mejlisi xitay ishliri komitétining yéqinda élan qilghan doklatida, xitayning "Insaniyetke qarshi jinayet sadir qiliwatqanliqi" tekitlen'genidi. Uyghur aptonom rayonluq adem küchi we ijtima'iy parawanliqi nazaritining "Kespiy terbiyelesh" ishlirigha mes'ul emeldari lyang ping, bu yilliq "Terbiyelesh" ning asasi nuqtisi karxanilardiki ishchi-xizmetchiler, ishqa orunlashturulidighan "Nishanliq top", arxip turghuzulghan namrat sheher-yéza emgek küchlirige qaritilidighanliqini bildürgen. "Tengritagh" torining xewiride qeyt qilinishiche, da'iriler ötken yili 12‏-ayning axirlirighiche Uyghur aptonom rayonining 14 wilayet, oblast we shehride 130 ming 50 kishige "Kespiy terbiye" élip barghan.

Toluq bet