Қәшқәрдики таҗсиман вируси тездин көпийишкә башлиди

Мухбиримиз әзиз
2020-10-28
Елхәт
Пикир
Share
Принт

Қәшқәрдә давам қиливатқан таҗсиман вирусиниң алдинқи күндә йеңидин 22 кишигә юққанлиқи, буниң билән нөвәттә юқумдарларниң сани 183 кә йәткәнлики нөвәттики юқум әһвалиниң тез кеңийиватқанлиқини көрсәтмәктә икән. Хитай һөкүмитиниң канийи болған шинхуа агентлиқиниң 28-өктәбирдики хәвиридә ейтилишичә, бу юқумдарларниң һәммиси қәшқәр вилайитиниң конашәһәр наһийиси тәвәсидә икән.

Қәшқәрдики юқум әһвали вә тәкшүрүш хизмити һәққидә көплигән гуманлиқ соаллар оттуриға қоюлуватқанда конашәһәр наһийәсидики қамал тәдбирлири әтраптики қошна йезиларғичә омумлашқан. Җүмлидин вирусниң башланған нуқтиси дәп қариливатқан, шундақла бәзи мутәхәссисләр мәҗбурий әмгәк давам қиливатқан лагер завутлириниң бири болуши мумкин, дәп қараватқан зәмин йезиси 3-кәнтидики тоқумичилиқ завутиниң тақиветилгәнлики хитай ахбаратлиридин кәң йәр алған.

Хитай һөкүмитиниң түрлүк хәвәрлиридә уштумтут байқалған вирус юқуми сәвәблик күтүлмигән қамал тәдбири елинғанлиқи, буниң билән һәрқайси аилиликләрниң өйлиригә қамилип қалғанлиқи, шундақ болсиму 24 саәтлик қизиқ линийә телефони арқилиқ бу кишиләрни күндилик лазимәтликләр билән тәминләшниң муқим давам қиливатқанлиқи ейтилған. Һалбуки, муһаҗирәттики көзәткүчиләр илгири хитай өлкилиридә вә йеқинда үрүмчидә иҗра қилинған қамал тәдбирлирини мисал қилиш арқилиқ нөвәттики қамал җәрянида шу җайдики йәрлик аһалиниң қандақ мүшкүлатларға дуч келиватқанлиқини тәсәввур қилиш қийин икәнликини билдүрди.

Мәлум болушичә, шу күнниң өзидә пүткүл хитай бойичә 42 нәпәр йеңи юқумдар байқалған болуп, буниң 22 нәпири конашәһәр наһийәсидә икән. Әмма хитай һөкүмитиниң бу хилдики әһвалда һечқачан һәқиқий санни мәлум қилмайдиғанлиқи түпәйлидин көп қисим анализчилар бу санниң әмәлийәттә буниңдин көп икәнликини алға сүрмәктә икән.

Пикирләр (0)
Share
Толуқ бәт