Xitayning wirusqa qarshi "Jeng weziyiti" yaritip ahalilerni qamal qilishi naraziliq qozghighan

Amérikadiki döletlik ammiwi radi'o, yeni NP ning xewer qilishiche, Uyghur rayonida korona wirusi qayta yamrighandin kéyin xitay bu rayonni sirttin ayriwetken bolup, texminen 22 milyon ahale öyidin chiqalmaydighan halet shekillen'gen. Yerlik emeldarlarning bildürüshiche, 800 dek késelning bir yerge toplinip dawalinishi üchün mushundaq tedbir qollinilghan. 7-Ayning otturisida Uyghur rayonluq hökümet bu rayonning "Jeng haliti" ge kirgenlikini jakarlighan. Mehelle kadirliri öymu öy kirip ishiklerni péchetlep, ahalilerning sirtqa chiqishini chekligen.

Aldinqi heptining axirida Uyghur rayonidiki ahaliler bu ehwalgha bolghan naraziliqini xitaydiki ijtima'iy alaqe torlirida ashkarilashqa bashlighan, emma bu widiyolar derhal öchürülgen. Bireylenning ashkarilishiche, mehelle kadirliri birersining talagha chiqqinini körse derhal saqchigha melum qilidiken. Öyige solan'ghan ahalilerning turmush éhtiyajini qamdash üchün mehelle kadirliri yaki pida'iylar zörür lazimetliklerni yetküzüp béridiken. Emma xitayda mehelle mulazimiti tereqqiy qilmighachqa ahalilerning tolisi ach qalghan.

Radi'o muxbirlirining igilishiche, ahalilerge yene qongur renglik bir xil jungyi dorisi mejburiy ichküzülüwatqan bolup, késel yuqmighanlar bu dorini ichse wirustin saqlinalaydu dep teshwiq qilin'ghan, hazir bu dorining ishlitilish nisbiti yüz pirsentke yetken, emma tébbiy sahede bu dorining ünümlük yaki ünümlük emesliki téxi ispatlanmighan.

Bu xil "Jeng weziyiti" ning qachan ayaghlishidighanliqi heqqide xitay emeldarliri konkrét waqit békitmigen, ürümchi sheherlik hökümetning bir xitay emeldari: "Bizning qamal qilish siyasitimiz yuqumluq késel bashlan'ghan waqit bilen axirlishidighan waqitni asas qilidu" dégen.

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar