Хитай таратқулири америка билән иран оттурисидики сүркилиштә иранға йәл бәрмәктә

Мухбиримиз қутлан
2017-09-23
Елхәт
Пикир
Share
Принт

Корейә йерим арилиниң вәзийити күнсайин җиддийлишиватқан, америка билән шималий корейә оттурисидики тәһдит характерлик «тил уруши» юқири пәллигә көтүрүлгән бир мәзгилдә америка билән иран оттурисидики сүркилишләрниң йәниму күчийиватқанлиқи билинмәктә.

Ройтерс агентлиқиниң хәвиригә қариғанда, 19-сентәбир күнидики бирләшкән дөләтләр тәшкилатиниң омумий йиғинида америка президенти доналд трамп иранни қаттиқ әйиблигән. У, иран наһайити «хәтәрлик» болған башқурулидиған бомба қурулушини давамлаштурмақта һәмдә уни йәмән, сүрийә вә райондики башқа дөләтләргә експорт қилмақта, дегән.

Шу күни иранниң әң алий диний даһийси айәтулла ели һаминий трампниң сөзигә инкас қайтуруп мундақ дегән: «иран бесим алдида һәргиз баш әгмәйду. Әгәр америка иран ядро келишимигә қарита һәрқандақ ‹хата һәрикәт' қолланса, иран һөкүмити буниңға күчлүк инкас қайтуриду.»

Иран президенти һессән роһаний 22-сентәбир күни теһранда өткүзүлгән һәрбий паратта сөз қилип, әгәр зөрүр тепилса иран армийисиниң түрлүк қисимлириға техиму көп башқурулидиған бомба сәпләйдиғанлиқини билдүргән. У, «иран өзиниң башқурулидиған бомба қурулушини елип беришта башқа бир дөләттин иҗазәт соримайду,» дегән.

Америка билән иран оттурисидики ядро мәсилисини өзәк қилған сүркилишләр күчийишкә башлиған пәйттә хитай һөкүмәт таратқулири иранға йәл берип, америкини әйиблигән. Шинхва тори 19-сентәбир күни мақалә елан қилип, «трамп вәзипигә олтурғандин буян, иранниң башқурулидиған бомба қоюп бериштә чиң турғанлиқини баһанә қилип иранға үзлүксиз бесим ишләтти. Иранға қаритилған җаза муддитини узартти шундақла иран пуқралириниң америкиға киришини чәклиди,» дегән. 

Көзәткүчиләр, хитай һөкүмәт таратқулириниң америка билән иран оттурисидики бу қетимлиқ сүркилиштин пайдилинип, иран тәрәпкә давамлиқ йәл бериватқанлиқини илгири сүрмәктә.

Пикирләр (0)
Share
Толуқ бәт