Бейҗиң олимпик мусабиқисиниң кишини чөчүтәрлик иқтисадий һимайичилири ашкариланди

Мухбиримиз әзиз
2021-10-14
Share

Хитай һөкүмитиниң уйғур дияридики ирқий қирғинчилиқини әйибләш вә уни чәкләштики бир муһим тәдбир қатарида тилға елиниватқан темиларниң бири-бейҗиң қишлиқ олимпик мусабиқисини байқут қилиш болуп кәлгән иди. "блумберг хәвәрлири" ториниң бу һәқтики тәкшүрүш доклати 2022-йилидики бейҗиң олимпик мусабиқисини иқтисадий җәһәттин қоллаватқан ширкәтләрниң бу қетимлиқ мусабиқидин алидиған пайдисини тунҗи болуп ашкарилиди.

"блумберг хәвәрлири" ниң 13-өктәбирдики хәвиридә ейтилишичә, алдинқи орунда туридиған 12 хәлқаралиқ ширкәт бейҗиң олимпик мусабиқисигә даир түрлүк паалийәтләрдин тәхминән 110 милярт америка доллири кирим қилиш алдида турмақта икән. Буниң ичидә Toyota, Samsung, Intel, Panasonic қатарлиқ төт чоң ширкәтниң алидиған пайдисила 95 милярт америка доллириға йетидикән. Һалбуки, бу ширкәтләрниң һәммисила "блумберг хәвәрлири" ниң бу һәқтики соаллириға җаваб бериштин өзлирини елип қачқан. Omega Вә Airbnb ширкәтлирила җаваб қайтуруп: "биз дәрвәқә уйғурларниң қирғин қилиниватқанлиқи һәққидики хәвәрләрни аңлидуқ. Шуңа бу әһвалларни йеқиндин көзитиватимиз," дегән.

Хәлқара саһәниң бейҗиң олимпик мусабиқисини байқут қилиш чақириқини оттуриға қоюшидики бир муһим сәвәб хитай һөкүмитиниң уйғурларни қирғин қилиши вә хоңкоңдики демократийә муһитини хараб қилиши болуп, бу мәсилә көп қетим хәлқара олимпик комитетиға инкас қилинған иди. Йеқинда уйғурларниң қирғинчилиқ қилиниватқанлиқи һәққидики әһваллар йәнә бир қетим мәзкур комитетниң муавин рәиси җон коатестин соралғанда, у мундақ дәп җаваб бәргән: "биз дунявий һөкүмәт әмәс. Хитайниң кишилик һоқуқтики ишлириға биз арилишалмаймиз. Йәнә келип биз пәқәт олимпик мусабиқисигә саһибханлиқ қилидиған дөләтниң игилик һоқуқиға һөрмәт қилимиз."

Әмма олимпик әһдинамисиниң баш бетигә "тәнтәрбийә паалийәтлири арқилиқ техиму гүзәл дуня қуруп чиқимиз" дәп йезилған болуп, нөвәттә бир қисим һөкүмәт әмәлдарлири бейҗиң қишлиқ олимпик мусабиқисини өткүзүш дәл ашу хил әһдинамигә хилаплиқ қилғанлиққа баравәр, дәп қаримақта икән. Америка кеңәш палатасиниң әзаси марко рубйо әпәнди бу һәқтә қилған сөзидә: "ғәрб ширкәтлириниң бейҗиң олимпик мусабиқисини иқтисадий җәһәттин қоллиши маһийәттә ‹қирғинчилиқни бәхудүк давам қилиңлар' дегәнликкә баравәр" дәп көрсәткән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт