Америка хитайниң DJI ни өз ичигә алған йәнә 8 ширкитини қара тизимликкә алди

Мухбиримиз әркин
2021-12-15
Share

Америка малийә министирлиқи хитайниң дунядики әң чоң дрон , йәни учқучисиз айроплан ишләпчиқириш карханиси-DJI, йәни “шинҗен даҗяң кәшпият чәклик ширкити” ни өз ичигә алған йәнә 8 ширкитини уйғурларни назарәт қилишқа қатнашқанлиқи сәвәблик қара тизимликкә алған. Мәлум болушичә, малийә министирлиқи бу ширкәтләрниң мәһсулатлирини чәкләпла қалмай, уларға мәбләғ ақтурушниму чәклигән. Көзәткүчиләр, бу қарарниң юқириқи ширкәтләргә қаттиқ зәрбә беридиғанлиқини ейтқан.

“малийә вақти” гезити 14-декабир бәргән хәвиридә, америка малийә министирлиқиниң бу 8 ширкәтни өзлириниң “хитай һәрбий-санаәт ‍өз ара бирләшкән ширкәтлири” қара тизимликигә алғанлиқи, чүнки бу ширкәтләр уйғур мусулманлирини назарәт қилишқа қатнашқанлиқини ейтқанлиқи тәкитләнгән. “малийә вақти” гезитиниң қәйт қилишичә, бу 8 хитай ширкити DJI дин башқа мәгви, давниң учур санаити, йүнсоң, мейя бәйке, йиту, леон технологийә қатарлиқ ширкәтләрни өз ичигә алидикән.

Америка малийә министирлиқиниң қарари ақсарай, президент байденниң “уйғур мәҗбурий әмгикиниң алдини елиш қанун лайиһәси” ни имзалайдиғанлиқини билдүргән бир вақитта елан қилинған.

Америка авам палатаси билән кеңәш палатаси 14-декабир пикир бирлики һасил қилған бу қанунниң ахирқи лайиһәси шу күни авам палатасида мақуллинип, кеңәш палатасиға сунулғаниди. Буниң алдида хитайниң “шаңтаң технологийә ширкити” малийә министирлиқиниң қара тизимликигә елинған. Буниң билән шаңтаң гуруһи хоңкоң аксийә базирида 767 милйон долларлиқ пай чеки тарқитиш пиланини кечиктүрүшкә мәҗбур болғаниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт