Xitayning braxmapotra deryasining tibettiki bash éqimida su qurulushi élip bérish pilani hindistanni endishige salghan

Muxbirimiz qutlan
2017-11-25
Share

Xitayning yéqindin buyan tibet térritoriyisidiki muzluqlardin bashlinip, hindistan'gha éqip baridighan xelq'araliq derya-taramlarni tosup, su ambiri yaki su éléktr istansisi yasimaqchi bolghanliqi hindistan terepning endishisini qozghighan.

“Hindistan waqti” gézitining xewirige qarighanda, xitay hökümiti hindistan qatarliq qoshna ellerning diqqitini qozghimasliq üchün biraxmapotra we gan'gé deryalirining tibet térritoriyisidiki bash éqimida élip barmaqchi bolghan su qurulushi pilanini waqitliq toxtatqan. Buning ornigha tibet égizlikidin xitay ölkilirige qarap aqidighan deryalarning bash éqimida su qurulushi élip bérishqa bashlighan.

Xitayning “Yer shari waqit géziti” bu heqte mexsus maqale élan qilip, “Jinsha, lensang we nüjyang deryalirining tibettiki bash éqimida ghayet zor su énirgiyesi mewjut. Uning üstige bu deryalar hindistan'gha aqidighan deryalar emes,” dégen.

Hindistan taratquliri buninggha inkas qayturup, xitay tibettiki su qurulushini gerche xelq'araliq derya-taramlardin ichki deryalirigha yötkigendek körünsimu, lékin bu peqet bir körünüsh, xalas. Ularning yoshurun pilani yenila xelq'araliq deryalarning süyide, dégen.

Ötken ayda xitayning braxmapotra deryasining tibet térritoriyisidiki bash éqimini tosup su ambiri yasimaqchi bolghanliqi, u yerdin 1000 kilométir uzunluqtiki tonil arqiliq bu suni Uyghur diyarigha bashlap barmaqchi bolghanliqi heqqide xewer tarqalghan idi. Xitay hökümet taratquliri buninggha inkas qayturup, “Bu saxta xewer, toghra emes,” dégen.

Igilinishiche, xitay bilen hindistan otturisidiki intayin nazuk bolghan talash-tartishlar yalghuz chégra mesilisidila emes, belki ikki dölet arisidiki xelq'araliq derya-taramlar we su menbesini talishishtimu ipadilinidiken. Hindistan terep xitayning tibettiki derya-taramlarda élip bériwatqan her bir herikitige yéqindin diqqet qilmaqtiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet