Дуня сәһийә тәшкилати зика вирусиниң хитайда ямрап кетиш еһтимали барлиқини агаһландурди

Мухбиримиз әркин
2016.01.28
Share on WhatsApp
Share on WhatsApp

Дуня сәһийә тәшкилати пәйшәнбә күни хитай қатарлиқ дөләтләрни агаһландуруп, латин америкисида таралған зика вирусиниң бу әлләргә тарқилиш вә ямрап кетиш еһтимали барлиқини билдүрди.

Дуня сәһийә тәшкилатиниң әмәлдари брус айлвард: “әдис типлиқ паша яшайдиған дөләтләр зика вирусиниң тарқилишидин әндишә қилиши керәк” дегән.

Әдис бир хил паша түри болуп, мәзкур паша түри тропик, субтропик бәлвағда яшисиму, әмма йеқиндин буян у антарктикадин башқа барлиқ районларда байқалған. Униңдин тарқалған зика вируси бовақларда туғма кесәллик, нерва мәсилилирини пәйда қилидикән.

Әмма бу зика вирусиниң тунҗи қетим байқилиши әмәс. У, буниңдин 70 йил бурун африқиниң уганда орманлиқидики бир маймунда байқалған.

Дуня сәһийә тәшкилати зика вирусиға қарши мәхсус бөлүм қурған. Мәзкур бөлүмниң пәрәз қилишичә, америка қитәси дөләтлиридә 3-4 милйон адәм зика вирусидин юқумлиниши мумкин. Һазир, мәзкур вирус 23 дөләткә тарқалған.

Америкида болса, мәзкур вирусидин 31 адәм юқумланған. Президент обама “зика вирусиға қарши җиддий синақ елип берип, ваксина ишләпчиқириш вә давалашни тезлитиш” ни тәләп қилди. Бирақ һазирға қәдәр мәзкур вирусни контрол қилишниң үнүмлүк чариси тепилмиған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.