Б б с: ши җинпиң 19-қурултайда қаидини бузди, сиясий бюро избазарсиз

Мухбиримиз шөһрәт һошур
2017-10-25
Елхәт
Пикир
Share
Принт

Хитай компортийәсиниң 19-қурултийи бүгүн йәни 25-өктәбир күни йепилди. Хәлқара хәвәрләрдә дейилишичә, қурултайниң ечилишидин йепилишиға қәдәр җәряни вә нәтиҗиси йәни ши җинпиңниң вәзиписини давам қилиши вә һакимийәттики орнини мустәһкәмлиши хәлқара көзәткүчиләрниң күткинидин пәрқлиқ болмиди; пәқәт йеңидин тәйинләнгән сиясий бюрода избасар дәп қаралғудәк кишиниң болмаслиқи бир қисим көзәткүчиләрни әҗәбләндүрди.

Б б с ниң бүгүнки бу һәқтики хәвиридә дейилишичә, ахбарат саһәсидә, ши җинпиң вә ли кечяңниң избасари дәп қарилип келиватқан 54 яшлиқ ху чүнхуа билән 57 яшлиқ чен минер йеңи сиясий бюро даимий комитетиға кирәлмигән.

Б б с ниң хәвиридә дейилишичә, хитайда давамлишип келиватқан қаидә бойичә хитай дөләт рәиси вә баш министир икки нөвәтла вәзипә өтиши, иккинчи нөвәтлик вәзипә тапшурувалидиған чеғида келәр нөвәтлик избасарлиридин шәпә бериши керәк.

Б б с да бу һәқтә пикир баян қилған хоңкоңлуқ мутәхәссисләр сиясий бюрониң йеңи даимий һәйәт әзалири ли җәншу, ваң яң, ваң хуниң, җав леҗи вә хән җең қатарлиқларниң хитай һакимийәт қатлимида тәсир күчи болмиған кишиләр икәнликини илгири сүргән; улар йәнә бу әһвалниң гәрчә ши җинпиңниң орниниң мустәһкәмлинишигә пайдилиқ болсиму, әмма сиясий бюрониң коллектип рәһбәрлик иқтидарида аҗизлиқ шәкилләндүргәнликини әскәрткән.

Бәзи көзәткүчиләр ши җинпиңниң йеңи сиясий бюроға йеши 60тин һалқиған вә тәсир күчи аз шәхсләрни таллаш арқилиқ өзигә 3-қетим вәзипә тапшурувелиш үчүн йол ечиватқанлиқини илгири сүрсә, йәнә бәзиләр нөвәттики бәш йилни сағлам давамлаштуруш үчүн ул салғанлиқини оттуриға қойған

Пикирләр (0)
Share
Толуқ бәт