Явропа иттипақиниң юқири дәриҗилик әмәлдарлири ши җинпиң билән көрүшкән, бирақ көрүнәрлик нәтиҗә һасил қилалмиған

Вашингтондин мухбиримиз ирадә тәйярлиди
2023.12.07

Явропа иттипақиниң юқири дәриҗилик әмәлдарлири 7-декабир пәйшәнбә күни бейҗиңда хитай компартийәсиниң баш секретари рәиси ши җинпиң билән көрүшүп, икки тәрәп арисидики сода тәңпуңсизлиқи, кишилик һоқуқ, украина мәсилиси қатарлиқ бир қатар мәсилиләр үстидә сөһбәтләшкән.

Явропа иттипақи комитетиниң рәиси урсула вон дир лин вә явропа кеңишиниң рәиси чарлез мишел қатарлиқларниң хитай зиярити башлиниш алдида һәрқайси кишилик һоқуқ органлири баянат елан қилип, уларни уйғурлар мәсилисини оттуриға қоюшқа, болупму раһилә давут, илһам тохти қатарлиқ өмүрлүк қамақтики кишиләрниң қоюп берилишини тәләп қилишқа чақирған иди.

Явропа иттипақи һәйити 7-декабирдики учришиштин кейин елан қилған язма баянатида, “өзлириниң хитайдики кишилик һоқуқ вәзийити, болупму уйғур ели вә тибәттики системилиқ кишилик һоқуқ дәпсәндичилики, мәҗбурий әмгәк мәсилиси һәққидики әндишилирини қайта тәкитлигәнликини вә хитайни вәдилиригә әмәл қилишқа чақирғанлиқини” билдүргән.

Явропа иттипақи комитети радийомизниң бу һәқтики соаллириға қайтурған инкасида, явропа иттипақиниң хитай билән болған һәр дәриҗилик учришишларда давамлиқ һалда уйғур мәсилиси, җүмлидин хитайниң кишилик һоқуқ хатирисини тилға елип кәлгәнликини әскәрткән.

Ройтерс агентлиқиниң хәвиригә қариғанда, явропа иттипақиниң бу зиярәттә һәл қилмақчи болған асаслиқ мәсилиси, хитай билән болған содидики тәңпуңсизлиқни түгитиш икән. Бирақ учришишта содидики зиддийәтни һәл қилишқа мунасивәтлик конкрет қәдәм етилмиған икән. Икки тәрәп йәнә русийәниң украинаға қаратқан таҗавузчилиқ урушини тохтитиш мәсилисидиму бир илгириләш һасил қилалмиған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.