Kishilik hoquq teshkilatliri prézidént trampni xitay kishilik hoquq weziyitige diqqet qilishqa chaqirdi

6‏-Aprél, bir qanche kishilik hoquq teshkilati ortaq mektup élan qilip, amérika prézidénti donald trampni xitay re'isi shi jinping bilen körüshkende kishilik hoquq mesilisini otturigha qoyushqa chaqirdi.

Amérika qelemkeshler merkizi, xelq'ara hör tibet herikiti, amérika Uyghur birleshmisi, puqralar küchi qatarliq teshkilatlar élan qilghan mektupta, xitayning diniy we pikir erkinliki, Uyghur, tibet we oxshimighan pikirdiki öktichilerni basturuwatqanliqini ilgiri sürüp, bu uchrishishta "Biz prézidéntning bizning endishe we tewsiyelirimizni otturigha qoyup, söhbet jeryanida xelq'ara ölchemlerdiki asasiy kishilik hoquqni qoghdash mes'uliyitini ashkara ipadileshke chaqirimiz" dégen.

Prézidént tramp peyshenbe küni xitay re'isi shi jinpingni florida shtatida kütüwalghan. Yuqiriqi teshkilatlarning mezkur ortaq mektupi del xitay re'isi shi jinping floridagha yétip kelgen küni élan qilin'ghan.

Ular ortaq mektupida, ipade erkinlikining basturulushi endishe qozghawatqan halqiliq mesililerning biri ikenlikini eskertip, "Yéqindin buyanqi basturushlar noqul béyjingda yüz bérip qalmay, bashqa nurghun ölkilerde we déngiz boyidiki rayonlarda, tibet, shinjang, ichki mongghul qatarliq aptonom rayon we xongkongda yüz berdi" dégen.

Erkin tibet oqughuchilar herikiti namliq tibet teshkilatining amérika n téléwiziye qanili n b s gha bildürüshiche, ular mezkur mektupni peyshenbe küni aqsaraygha tapshurmaqchi bolghan iken.

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar