Хитайға тақабил турушни мәқсәт қилған "америка, японийә вә һиндистан" үч дөләт һәмкарлиқи шәкилләнгән

Мухбиримиз ирадә
2018-12-04
Share

Америка, японийә вә һиндистан һинди-тенч окян райониниң бихәтәрликини қоғдаш үчүн бирликтә һәрикәт қилидикән. Бу һәқтә елан қилинған хәвәрләрдин қариғанда, америка президенти доналд трамп, һиндистан баш министири моди вә японийә баш вәзири шинзо абе аргентинадики G20 дөләт башлиқлири йиғинида айрим учришип, юқиридики бу һәмкарлиқ үстидә сөһбәтләшкән. "японийә вақти" гезити вә "һиндистан вақти" гезитлири бу һәқтики хәвәрлиридә бу үч дөләтниң өз ара һәмкарлиққа түрткә болған амилниң ениқла хитай икәнликини билдүргән.

Хәвәрләрдә ейтилишичә, үч дөләтниң инглиз тилидики намлириниң баш һәриплири билән "JAI гурупписи" дәп аталған бу һәрикәт хитайниң һинди-тенч окян районидики кеңәймичиликигә ортақ қарши турушни мәқсәт қилған. 

Ройтерсниң хәвәр қилишичә, сәйшәнбә күни америка ташқи ишлар министири майк помпейо бирюсселда явропа дөләтлириниң ташқи ишлар рәһбәрлири билән учрашқан. Уму президент трампниң хитай, русийә вә иранни чәкләш үчүн йеңи бир дуня тәртипи шәкилләндүрүш үчүн һәрикәт қиливатқанлиқини ейтқан. Ташқи ишлар министири помпейо сөзидә: "биз очуқ-ашкара, адил вә әркин дөләтләрниң дунясини сақлап қелиш, қоғдаш вә уни қоллаш үчүн һәрикәт қиливатимиз" дегән. 

У сөзи давамида, хитайниң америка башчилиқидики тиҗарәт системиси вә башқа келишимләрдин пайдилинип кетиватқанлиқиниму тилға алған һәм америка президенти трампниң һазир бу әһвалға хатимә бериш үчүн дуня банкиси вә хәлқара пул-муамилә фонди қатарлиқ орунлар билән көрүшүп, уларни хитайға қәрз бәрмәсликкә дәвәт қиливатқанлиқини билдүргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт