Хитай һөкүмити уйғур елидә «җуңхуа әнәниви мәдәнийитини өгиниш» ни тәләп қилмақта

Мухбиримиз ирадә
2019-05-14
Елхәт
Пикир
Share
Принт

Хитай һөкүмити уйғур елидә «җуңгочә сотсиялизм идийәсини, җуңхуаниң әнәниви мәдәнийитини өгинишни кәң қанат яйдуруш» һәққидә йеңи бир нөвәтлик идеологийәлик тәшвиқат паалийәтлирини давамлаштурмақта.

Тәңритағ тори вә ақсу ахбарат тори қатарлиқларда бу һәқтә тарқитилған хәвәрләрдин қариғанда, уйғур райони даирилири мәхсус һәрқайси җайларда «җуңхуаниң әнәниви мәдәнийитини зор күч билән әвҗ алдурушни, җуңхуаниң әнәниви мәдәнийитигә қәтий варислиқ қилишни» тәләп қилишқан.

Ақсу ахбарат ториниң хәвиридин қариғанда, ақсу вилайәтлик партком нәзәрийә өгиниш мәркизий гурупписи 5  айниң 8  күни 6  қетим коллектип өгиниш қилған. Йиғинда «ши җинпиңниң йеңи дәвр җуңгочә сотсиялизм идийәсини чоңқур өгинип, өзләштүрүп, җуңгочә сотсиялистик мәдәнийәтни меңигә, қәлбләргә чоңқур сиңдүрүш» дегәнләр тәкитләнгән.

Көзәткүчиләрниң қаришичә, хитай һөкүмити йеқинқи йиллардин буян аталмиш «җуңхуа мәдәнийити», «җуңхуа миллити» дегән уқумларни базарға селоп вә уйғурларниң өз тарихи, өз мәдәнийити вә миллий кимликидин пәхирлиниш роһини чәкләп, униң орниға җуңхуа миллий кимликини тиклимәктә шуниңдәк әмәлийәттә хитай мәдәнийитини, хитай милләтчиликини тәрғиб қилип кәлмәктикән.

Хитайниң бу һәрикити, болупму 2017-йилидин башлап, 800 миңдин 2 милйонғичә уйғурни «қайта тәрбийә лагерлири» ға қамашни башлиғандин бери һәссиләп күчәйгән. У, уйғур елидә хитайниң чаған байрими, панус байрими дегәндәк байрамлириниң дағдуға билән тәбриклиниши, уйғурларға панус вә мәснәви тарқитип берилиши, уйғур балилириниң мәктәп вә йәслиләрдә хитайчә пасонда кийиндүрүлүп җиңҗүгә ойнашқа, хитайниң классик тиятирлирини ойнаш, классик шеирлирини ядлашқа селиниши билән рошән ипадиләнгән.

Көзәткүчиләр «җуңхуаниң әнәниви мәдәнийитини зор күч билән әвҗ алдурушни» тәкитләш хитай һөкүмитиниң уйғурларниң миллий кимликигә вәкиллик қилидиған барлиқ елементларни сүпүрүп ташлаш үчүн җиддий һәрикәткә өткәнликидин дерәк бериду, дәп қаримақта.

Пикирләр (0)
Share
Толуқ бәт