Aqsugha yéqin jayda 7 bal yer tewrigen

Gérmaniye yer shari ilim-pen tetqiqat merkizining 23-yanwar küni (yerlik waqit) bergen melumatigha qarighanda, 2024-yil 1-ayning 23-küni kéche sa'et 2 de Uyghur rayoni aqsu wilayitige yéqin jayda 7.1 Bal yer tewrigen. Bu yer tewresh yer postining 10 kilométir chongqurluqtiki qatlimida yüz bergen bolup, bu téyiz qatlamdiki yer tewresh uningdinmu chongqur qatlamdiki yer tewreshke baqqanda küchlük bolidiken, chünki uning yer yüzdiki tesiri téximu chong bolidiken.

Halbuki, xitay taratquliri bu qétimliq yer tewresh nuqtisigha jiddiy qutquzush etriti we esliheliri ewetkenlikini xewer qilghan bolsimu, emma yer tewreshte ölüm-yitim yaki yarilinish hadisilirining bar-yoqluqi heqqide hazirgha qeder xewer bermidi.

Bu yer tewreshke a'it deslepki sanliq melumatlargha asaslan'ghanda, bundaq yer tewrigende, yer tewrigen jaydiki kishilerning hemmisi uni sézeleydiken. Bu xil yer tewresh yenggil we ottura derijilik apetlerni peyda qilalaydiken. Ottura derijilik yer tewrigen jay aqsu aykölge 128 kilométir, qara kölge 134 kilométir kélidighan yerde yüz bergen.

“Wolqanlarni bayqash” tor bétide élan qilin'ghan bu xewerde yene, mezkur rayonda yüz bergen we yüz bérish éhtimali bolghan yer tewreshler heqqidiki sanliq melumatlarning dawamliq yéngilinip turidighanliqi bildürülgen.

Xewerlerdin melum bolghinidek, ötken yil 12-ayning 19-küni kéchide gensu ölkiside 6.2 Bal yer yer tewrep, az dégende 127 adem ölgen, 700 adem yarilan'ghan bolup, Uyghur rayonining gensugha chégradash jaylirida we qizilsu oblasti atush shehirige tewe qarajol bazirida 5.5 Bal yer tewrigenidi.