Уйғур дияридики йеңи "йол башлиқи" бәлгилимиси диққәт қозғимақта

Мухбиримиз әзиз
2021-08-11
Share

Хитай һөкүмитиниң уйғур дияридики һүл муәссәсә қурулушиға ғайәт зор мәбләғ селиватқанлиқи йеқиндин буян көпләп мәлум болғаниди. "хитай хәвәрлири тори" ниң 11-авғусттики хәвиридә хитай һөкүмитиниң бу йил йерим йил ичидә уйғур дияриға 35 милярд сом (тәхминән бәш йерим милярд америка доллири) мәбләғ селип һәрқайси җайларға тутишидиған ташйолларни ясиғанлиқи, бу мәбләғниң бу йил ичидә җәмий 60 милярд сомға йәткүзүлидиғанлиқи ейтилиду.

Бу һәқтики хәвәрләргә әгишип хитай һөкүмитиниң уйғур диярида "йол башлиқи" түзүмини йолға қойидиғанлиқи һәрқайси саһәниң тегишлик диққитини қозғиди. "тәңритағ" ториниң 11-авғусттики хәвиридә ейтилишичә, хитай даирилири уйғур дияридики һәрқайси ташйол системисиға қарита "йол башлиқи" бәлгиләш түзүмини елан қилған болуп, 2022-йилиниң ахириға қәдәр һәрқайси наһийә вә йезилар оттурисидики пүткүл ташйол бөләклиригә "йол башлиқи" бәлгилинидиғанлиқи ейтилиду. Хәвәрдин мәлум болушичә, наһийә вә йеза дәриҗилик йолларға шу дәриҗидики қатнаш идарилириниң мәсуллири "йол башлиқи" қилип тәйинлинидикән. Буниңға мас һалда һәрқайси җайларда йәнә тармақ "йол башлиқи" тәсис қилинидикән. Хәвәрдә бу тәдбирниң ташйолларниң җиддий әһвалларда раван болуши һәмдә бихәтәрлик мәсилилири үчүн йолға қоюлғанлиқи ейтилиду.

Хитай һөкүмитиниң уйғур дияридики қатму-қат контроллуқ вә назарәт механизми изчил һәрқайси саһәниң тәнқид обйекти болуп кәлгәниди. Нөвәттики бу йеңи түзүмниңму әнә шу хилдики уйғурларни техиму қаттиқ контрол қилиш чарилириниң бири икәнлики алға сүрүлмәктә. Уйғур кишилик һоқуқ қурулуши тәшкилатиниң хадимлиридин луйиза грев бу һәқтә радийомизниң зияритини қобул қилғанда "хитай һөкүмити һазир уйғурларни контрол қилишта уларниң туғулушидин тартип өсүп чоң болуш вә дәпнә қилинишиғичә болған барлиқ һалқиларни толуқ контрол қилип болди" дегәниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт