15-Nöwetlik Uyghur yashlirini terbiyelesh kursi axirlashti
2018.03.20

Osloda ötküzülgen 15-nöwetlik Uyghur yash rehberlirini démokratiye, kishilik hoquq bilen terbiyelesh kursi axirlashti.
16-Marttin 18-martqiche norwégiyening oslo shehiride 3 kün dawamlashqan 15-nöwetlik Uyghur yashlirini kishilik hoquq, démokratiye, qanuniy bilimler bilen terbiyelesh kursi netijilik axirlashti.
Amérika démokratiyeni ilgiri sürüsh fondi jem'iyitining maddiy yardimi bilen d u q, rafto fondi jem'iyiti we norwégiye Uyghur komitéti birlikte teshkilligen bu qétimqi kursqa norwégiye, amérika, kanada, shiwétsiye, en'gliye, gérmaniye qatarliq ellerdin kelgen 60 etrapidiki yashlar, Uyghur siyasiy aktipliri, kishilik hoquq teshkilatlirining wekilliri, yawropa parlaménti xadimliri we her sahe mutexessisliri qatnashti.
Uyghur yashlirini terbiyelesh kursi bashlinishtin bir kün ilgiri “Nobél erkinlik sariyi” da Uyghurlarning omumiy weziyitidin melumat bérish yighini ötküzülüp, bu yighinda amérikidiki “Uyghur kishilik hoquq programmisi” ning diréktori ömer qanat, rafto fondining mes'ulliridin josteyin hole, xelq'ara kechürüm teshkilati norwégiye shöbisining mes'ulliridin gerald kador, norwégiye parlamént ezasi nikolas wilkinson, norwégiye tibet teshkilati re'isi namgyal soma, amérika frostburg uniwérsitétining tetqiqatchisi hayyün ma, wakaletsiz milletler teshkilati wekili ryan barry qatarliqlar Uyghurlar heqqide nutuqlar sözligen idi.
3 Künlük bu kursta xelq'ara kechürüm teshkilatining xizmetliri, norwégiyediki tibet we Uyghur teshkilatlirining pa'aliyetliri, wakaletsiz milletler teshkilatining xelq'ara siyasiy sehniliridiki pa'aliyetliri tonushturulush bilen birge, Uyghur yashlirigha qandaq qilghanda xelq'arada Uyghurlar mesilisini tesirlik rewishte tonutush, Uyghur milliy mujadilisini ünümlük tereqqiy qildurushning her türlük yolliri ögitildi.
D u q re'isi dolqun eysa ependi kurs xatimiside ziyaritimizni qobul qilghanda, Uyghur yashlirini terbiyelesh kursining netijilik bolghanliqini mu'eyyenleshtürdi.
18-Mart küni 3 künlük bu kurs axirlishishtin ilgiri, Uyghur yashliri neq meydanda praktika örneklirini körsetti. Yashlarning neq meydan praktikisidin kéyin, d u q re'isi dolqun eysa bashchiliqidiki qurultay rehberliri sehnige chiqip, yashlarning so'allirigha jawab berdi hemde d u q ning teshkiliy tüzülmisi, uning rehberliri heqqide qisqiche melumatlar berdi.
Norwégiye Uyghur komitéti re'isi bextiyar ömer ependi osloda chaqirilghan Uyghur yashlirini terbiyelesh kursidin özining hemde kursqa qatnashqan yashlarning köp memnun bolghanliqini tilgha aldi.
Kurs axirlashqan 18-mart kechte, bu qétimqi kursqa kelgen d u q rehberliri, chet'ellik méhmanlar norwégiyediki yüzligen Uyghur jama'iti bilen birge, norwégiye Uyghur komitéti uyushturghan noruz pa'aliyitige qatnashti.