Аманлиқ мудири: “мәмәттурсун һаҗи тарава намизини кәм оқуғанлиқи үчүн тутулди”

Мухбиримиз шөһрәт һошур
2018.01.08
abdujelil-hajim-karxanichi.jpg Абдуҗелил һаҗим(оңдин иккинчи) қатарлиқ қәшқәр вилайәтлик сода-санаәт бирләшмисиниң бир қисим әзалири исламабадтики шаһ файсал мәсчити алдида. 2014-Йили яз, пакистан.
RFA/Shöhret Hoshur

Қәшқәрдики бир пайлақчиниң “тәрбийә” ләштикиләр һәққидә паш қилғанлири (2)

Қәшқәрдә өткән йили тутқун қилинған 4 нәпәр тонулған сода-карханичи һәққидә мухбиримизға мәлумат бәргән қәшқәр часа башқармисиниң аманлиқ мудири, тутқунлардин “әзиз дияр сода сарийи” ниң саһиби мәмәттурсун һаҗиниң тарава намизини кәм оқуғанлиқи үчүн; “әмин сода сарийи” ниң саһиби ғени һаҗиниң нәзир йемигәнлики үчүн “диний әсәбийлик” гумани билән тутқун қилинғанлиқини ашкарилиди.

Биз мәзкур 4 нәпәр сода-карханичиниң тутулуш сәвәбини ениқлаш үчүн улар тәвә болған сақчиханиға телефон қилдуқ. Сақчи хадимлири әһвал һәққидә шәһәрлик тәшвиқат бөлүми билән алақилишишимизни тәвсийә қилди, әмма 4 нәпәр содигәрниң қамақта икәнликини инкар қилмиди. Қәшқәрдики часа башқармиси аманлиқ мудириниң паш қилишичә, абдуҗелил һаҗим диний етиқадиниң мустәһкәмлики вә җамаәтчиликиниң кәңрилики сәвәблик тутулған болса, ғени имин билән мәмәттурсун һаҗим, “диний әсәбийлик” баһаниси билән тутулған. Униң дейишичә, “әзиз дияр сода сарийи” ниң саһиби мәмәттурсун һаҗи алдинқи йили рамизан мәзгилидә таравини кәм оқуғанлиқи үчүн униң үстидин “диний әсәбийлик” гумани туғулған. “әмин сода сарийи” ниң саһиби ғени әмин нәзир йемигәнлики үчүн диққәт тартқан.

Вәзийәттин хәвәрдар аңлиғучимизниң баян қилишичә, даириләр уйғур содигәрләрни тутқун қилишта сақчиларға қариғанда пайлақчилардин көпрәк пайдиланған. Қәшқәр сақчилириниң тәҗрибилик пайлақчиси, часа башқармисидики аманлиқ мудириниң өзила 50 кә йеқин гуманлиқ киши үстидин мәлумат бәргән. У йип учи бәргән кишиләрдин 8 нәпири содигәр болуп, улар қәнт-нават содигири ришат һаҗи, әфәнди ширкитиниң саһини таһир һаҗи, вә қурулуш материяллири содигири савут мәмәт қатарлиқлардур. Өзиниң қәшқәр шәһәр ичидики икки асия базири, мәркизи мәсчит әтрапи вә той-төкүнләрдин учур топлайдиғанлиқини ашкарилиған мәзкур пайлақчи, өзи паш қилған 50 кишидин 30 чә кишиниң нөвәттә “тәрбийәләш мәркизи” дә икәнлики, қалғанлириниң алди 12 йил кәйни 5 йил кесилгәнликини баян қилди.

Бу пайлақчи йәни көрсәткән бу хизмәтлири сәвәблик һазирғичә һечқандақ бир мукапат алмиғанлиқи, әмма хитай дөләт бихәтәрлик тармақлиридин айда 300-500 йүән арисида мааш алғанлиқини баян қилди.

Қәшқәрдә нөвәттә қанчилик кишиниң пайлақчилиқ хизмитигә селиниватқанлиқи мәлум әмәс. Әмма 4 нәпәр содигәрниң тутулғанлиқи һәққидә бизгә мәлумат бәргән, қәшқәр вәзийитидин хәвәрдар бир аңлиғучимиз, нөвәттә хитай даирилириниң уйғур районидики қанунсиз вә ғәйрий инсаний иҗраатлирини давамлаштуруш үчүн өзиниң қорал күчидин башқа йәнә уйғур җәмийитидики әхлақий тәбиити аҗиз яки нормалсиз инсанлардинму пайдилиниватқанлиқини илгири сүрди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.