Әршидин исраилниң адвокати вә кишилик һоқуқ органлири : әршидин исраил хитайға әп кетилди

Әршидин исраилниң адвокати юри сергивеч қазақистан даирилиридин алған хәвиригә асасән әршидинниң қазақистан-хитай чеграси болған қорғасқа әп кетилгәнликини ейтқан.

Өз мухбиримизниң игилишичә, хитай җамаәт хәвпсизлик хадимлиридин тәшкил тапқан бир гуруппа әршидин исраилни сәйшәнбә күни қорғас арқилиқ үрүмчигә йөткәп кәткән болуп, әршидинни елип маңған 12 сақчиниң ичидә дилмурат вә ялқун исимлик икки уйғур сақчиму бар икән.

Буниңдин сирт, әршидинниң туғқаниң ейтип беришичә, әршидин исраил қорғасқа әп келингән шу күни кечидә, униң юрти болған сүйдүңдә 20 дин артуқ уйғур яш қолға елинған. Әмма бу яшларниң әршидинниң делоси билән қандақ мунасивитиниң барлиқи һазирчә ениқ әмәс.

Бүгүн кишилик һоқуқ органлиридин әркинлик сарийи вә хитайда кишилик һоқуқ намлиқ тәшкилатлар айрим - айрим һалда баянат берип қазақистанни әйиблиди. Улар өз баянатлирида явропа бихәтәрлик вә һәмкарлиқ тәшкилатиниң әзаси болған вә шундақла б д т ниң мусапирларни қоғдаш қануниға қол қойған қазақистанниң бу қилмишини қобул қилиш мумкин әмәс, дәп көрсәтти.