Испанийидики каталонйә аптоном райониниң парламент сайлимида мустәқилчиләр үстүнлүк қазанди

Испанийиниң шәрқи шималидики каталонйә аптоном районида өткүзүлгән парламент сайлимида, каталонйәдики мустәқиллиқни халайдиған партийә-гуруһлар үстүнлүккә еришкән.

Мәлум болушичә 135 кишилик парламентта мустәқилчиләрниң сани көп санлиқни игилигән. Сайламдин кейин пикир баян қилған, каталонйә аптоном райониниң рәиси артур мас, бу қетимқи сайлам нәтиҗисини “каталонйәниң мустәқиллиққа бир қәдәм илгирилиши” дегән.

Каталонйә испанийиниң шәрқи шималидики бир аптоном район болуп, униң йәр көлими 33 миң квадрат километир йәни испанийиниң тәхминән 15 тән бир қисмиға тоғра келиду. Каталанларниң нопуси болса 7 милйон 500 миң.

Түркийиниң NTV хәвиридә билдүрүлүшичә, каталанларниң көпинчиси испанийидики федератсийә түзүмини каталанларниң тәрәққиятиға тосалғу пәйда қилди дәп қарайду. Шуңа һакимийәт бешидики партийә каталонйәниң мустәқиллиқини омумий хәлқ авазға қоюшни тәшәббус қилип кәлгән болсиму, әмма парламенттики әзалириниң сани йетәрлик болмиғачқа, мәзкур пилани әмәлгә ашмай кәлгән.

Әмма испанийиниң асаси қанунида, мустәқиллиқни авазға селишни чәкләйдиған маддилар бар болғачқа, буниңдин кейин, испанийидики федератсийә һөкүмәт билән каталанлар арисида мәзкур темида қануний вә сиясий бир маҗираниң әвҗ алдиғанлиқи тәхмин қилинмақта.