12 яшлиқ уйғур өсмүрниң өлтүрүлүшигә наразилиқ билдүрүп вашингтондики хитай әлчиханиси алдида намайиш өткүзүлди

Америка уйғур җәмийити тәрипидин уюштурулған мәзкур намайиш, корла сақчи даирилириниң 20‏-май мирзат аманулла шаһяри исимлик 12 яшлиқ бир өсмүр балини мәхпий қуран курсиға қатнашқанлиқ сәвәбидин тутуп кетип, әтиси аилисигә җәситини тапшуруп бәргәнликигә наразилиқ билдүрүш йүзисидин елип берилған.

Мирзат аманулланиң мәккидә турушлуқ дадисиниң ашкарилишичә, мирзатниң бәдән, боюн вә баш қисмида еғир таяқ изи болсиму, бирақ корла сақчи даирилири униң анисини чақирип, мирзатниң тамға үсүп өлүвалғанлиқи вә җәсәтни һечқандақ давраң салмай дәрһал дәпинә қиливетишни тәләп қилған.

Бу вәқә ахбарат васитилиридә ашкариланғандин кейин, чәтәлдики уйғур муһаҗирлири арисида күчлүк инкас қозғиған иди. Бу вәқәниң йәнә, мәмликәт ичи вә сиртида “5-июл вәқәси” дин буян из дерәксиз йоқап кәткән уйғурларниң из дерикини қилиш чақириқи күчийиватқан мәзгилдә йүз бериши, илгириләп наразилиқ қозғиған.

Җүмә күнки намайиш америкиниң шәрқий қирғиқи вақти билән чүштин кейин өткүзүлгән. Бу җәрянда намайишчи амма хитайниң уйғурларға қаратқан сияситини тәнқид қилидиған һәр хил шоарларни товлап, уйғурларниң кишилик һоқуқиға һөрмәт қилишни тәләп қилған.