Xitay axbarati Uyghur élide ayropilan görüge élish weqesi yüz bérip emelge ashmighanliqini ilgiri sürdi
2012.06.29
Xewerde ayropilan xoten ayrodromidin qozghilip on minuttin kéyin, 6 neper yoluchining ayropilanni görüge élishqa urun'ghanliqi, biraq ayropilan xadimliri we yoluchilar teripidin boysundurulup, ayropilanning saq-salamet xoten ayrodromigha qaytip chüshkenliki ilgiri sürülgen. Uyghur aptonom rayonluq hökümetning axbarat bayanatchisi xu xenmin, fransiye agéntliqigha muxbirigha ayropilanni görüge almaqchi bolghanlarning Uyghur ikenlikini bildürgen.
Da'iriler mezkur weqeni “Zorawan térrorluq qilmish” dep békitip, musa yüsüp, ababekri ibrahim, memet éli yüsüp, yasin memet qatarliq 6 ismini élan qilghan bolsimu, biraq ular qollan'ghan eswablarni ayropilan'gha qandaq élip chiqqanliqi heqqide héchqandaq uchur bermigen.
Dunya Uyghur qurultiyi shu küni derhal bayanat élan qilip, xitay da'irilirining weqeni burmilighanliqini ilgiri sürdi. D u q bayanatchisi dilshat rishitning bildürüshiche, weqe ayropilandiki Uyghur yoluchilar bilen xitay yoluchilarning öz ara orunduq taliship yüz bergen majiradin kélip chiqqan.
Biraq xitay da'iriliri görüge alghuchilarning uchquchi kabinkisigha kirishke urun'ghan bolsimu, lékin ishikni achalmighanliqi, ayropilandiki yoluchilardin az dégende 4 kishining yarilan'ghanliqini ilgiri sürmekte.
Mezkur weqe xitay da'irilirining “5-Iyul weqesi” ning 3 yilliqi yétip kélishtin burun Uyghur élide amanliq tedbirlirini kücheytip, keng kölemlik tazilash élip bériwatqan, tasadipiy weqelerning yüz bérishidin saqlinishqa urunuwatqan bir mezgilde yüz bérip, közetküchilerning diqqitini qozghidi.