བོད་མི་ཚོར་ཆོས་དད་རང་དབང་ཡོད་མེད་གསལ་བོ་བསྟན་སོང་།

དུས་དབང་གོ་སྒྲིག་ཚོགས་ཆུང་གི་ངོས་ནས་གསར་འགོད་གསལ་བསྒྲགས་གནང་སྐབས། ༢༠༡༧།༡།༤

རྒྱ་ནག་གཞུང་གིས་བོད་ནང་གི་བོད་མི་ཚོར་ཆོས་དད་རང་དབང་ཇི་ཙམ་ཡོད་མིན་གསལ་པོར་བསྟན་པ་དུས་དབང་གོ་སྒྲིག་ཚོཊ་ཆུང་གིས་གསུངས་འདུག
བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་དབུ་བཞུགས་ཐོག་༧སྐུ་བཅར་རྣམ་རྒྱལ་གྲྭ་ཚང་གི་ཕྱོགས་གྲྭ་གསུང་ཞབས་རྣམས་ནས་དཔལ་དུས་ཀྱི་འཁོར་ལོའི་དབང་ཆེན་གྱི་སྔོན་འགྲོའི་ས་ཕྱོགས་ཀྱི་རིམ་པ་ཁག་ཕྱི་ཚེས་༣་ཉིན་ལེགས་གྲུབ་མཛད་ཅིང་། ཕྱི་ཚེས་༤་ཉིན་རྒྱབ་ནས་དུས་འཁོར་གྱི་རྡུལ་ཚོན་གྱི་དཀྱིལ་འཁོར་བཞེངས་རྒྱུ་དབུ་འཛུགས་གནང་ཡོད་པ་རེད།
ཕྱི་ཚེས་༥་ནས་སྔ་དྲོ་༧གོང་ས་སྐྱབས་མགོན་ཆེན་པོ་མཆོག་དང་ཕྱོགས་གྲྭ་དགེ་འདུན་པ་རྣམས་ནས་བདག་བསྐྱེད་ལ་སོགས་པའི་ཞལ་འདོན་གསུང་རྒྱུ་དང་། མུ་མཐུད་དུ་རྡུལ་ཚོན་གྱི་དཀྱིལ་འཁོར་འབྲི་བཞེང་གནང་རྒྱུ་ཡིན་ཞིང་། ཉིན་རྒྱབ་ཕྱག་ཚོད་༡༢།༣༠་ནས་༣་བར་༧གོང་ས་༧སྐྱབས་མགོན་ཆེན་པོ་མཆོག་གིས་སྤྱོད་མཇུག་ཆེན་མོ་དང་སྒོམ་རིམ་བར་པའི་སྒོ་ནས་སྔོན་འགྲོའི་གསུང་ཆོས་སྩོལ་གནང་མཛད་རྒྱུ་ཡིན་པ་རེད།
ཕྱི་ཚེས་༤་ཕྱི་དྲོ་དུས་འཁོར་དབང་ཆེན་གོ་སྒྲིག་ཚོགས་ཆུང་གི་ངོས་ནས་གསར་འགོད་ལྷན་ཚོགས་ཞིག་བསྐོང་ཚོགས་གནང་པ་དེའི་སྐབས། གོ་སྒྲིག་ཚོགས་ཆུང་གི་ཚོགས་གཙོ་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་ལགས་དང་། ཚོགས་གཞོན་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་ལགས་རྣམ་གཉིས་ཀྱིས། འདི་ལོའི་དུས་འཁོར་དབང་ཆེན་སྐབས་བོད་ནས་ཆོས་ཞུ་བར་རྒྱ་གར་དུ་འབྱོར་ཟིན་པ་དང་། བཅར་འདོད་ཡོད་པ་ཚོར་རྒྱ་ནག་གཞུང་གིས་སྔར་བྱས་མྱོང་མེད་པའི་དམ་དྲག་ཤུགས་ཆེ་བྱས་པའི་རྐྱེན་གྱིས་བོད་ནས་གསར་དུ་འབྱོར་བའི་བོད་མི་མང་ཆེ་བ་ཞིག་བོད་དུ་ཕྱིར་ལོག་མི་བྱེད་ཀ་མེད་བྱུང་བ་གསལ་བཤད་གནང་ཞིང་།  བཀའ་བློན་གཡུ་ཐོག་ཀརྨ་དགེ་ལེགས་ལགས་ཀྱིས་རྒྱ་ནག་གཞུང་གིས་བྱ་སྤྱོད་འདིས། རྒྱུན་དུ་རྒྱ་ནག་གཞུང་གིས་བོད་མི་ཚོར་ཆོས་དད་རང་དབང་ཡོད་ལུགས་བརྗོད་བཞིན་ཡོད་ཀྱང་ དོན་དངོས་ཆོས་དད་རང་དབང་ཇི་ཙམ་ཡོད་མིན་གསལ་པོར་བསྟན་པ་ཞིག་ཡིན་པ་གསུངས་པ་དང་། ཁོང་གིས་ད་དུང་སོ་སོའི་རྩ་བའི་བླ་མའི་སྐུ་མདུན་ནས་ཆོས་ཞུ་རྒྱུར་ཡང་འགོག་རྐྱེན་དམ་དྲག་བྱེད་ཀྱི་ཡོད་པ་རེད་ཅེས་གསུངས་ཡོད་པ་རེད།
དུས་དབང་གོ་སྒྲིག་ཚོགས་ཆུང་གི་ངོས་ནས་འདི་ལོའི་དུས་འཁོར་དབང་ཆེན་འདི་བཞིན་སྔོན་མའི་སྐབས་ལས་ཚགས་ཚུད་པ་ཡོད་པ་གསུངས་པ་དང་། འདི་ནི་གཙོ་ཆེ་རྒྱ་གར་བི་ཧར་གཞུང་དང་ས་གནས་རྫོང་། དེ་བཞིན་གྲོང་སྡེ་ལས་ཁུངས་སོགས་ཀྱིས་གང་ཅིའི་མཐུན་འགྱུར་གནང་པའི་ཉེར་ལེན་ཡིན་པ་གསལ་བཤད་གནང་ཡོད་པ་རེད།
ད་དུང་གསར་འགོད་ལྷན་ཚོགས་དེའི་སྐབས། དེ་སྔོན་གོ་སྒྲིག་ཚོགས་ཆུང་གི་ངོས་ནས་ཆོས་ཞུ་བ་གཉིས་འབུམ་ནས་གཉིས་འབུམ་ལྔ་ཁྲི་བར་འབྱོར་རྒྱུའི་ཚོད་དཔག་བྱས་ཡོད་ན་ཡང་། རྒྱ་ནག་གཞུང་གིས་བོད་མི་ཙམ་མ་ཟད་རྒྱ་ནག་སྐམ་ས་ཆེན་པོ་ནས་ཡོང་མཁན་ཚོའི་ཐོག་ལ་ཡང་དམ་དྲག་བྱས་པ་དང་། རྒྱ་གར་གྱི་དངུལ་ལོར་བརྗེ་བསྒྱུར་བྱས་པ་སོགས་ཕྱི་ནང་གི་འགལ་རྐྱེན་གྱི་རྐྱེན་པས་མི་མང་པོ་ཞིག་དུས་དབང་དུ་བཅར་མ་ཐུབ་པ་བྱུང་ཡོད་སྲིད་པ་གསུངས་པ་དང་ཆབས་ཅིག་གནད་དོན་འདི་དག་གིས་རྐྱེན་པས་དུས་འཁོར་དབང་ཆེན་གོ་སྒྲིག་ཐོག་ལྡོག་ཕྱོགས་ཀྱི་ཤུགས་རྐྱེན་གང་ཡང་བྱུང་མེད་པའི་ཐོག ཆོས་ཞུ་བ་ཆིག་འབུམ་ལྔ་ཁྲི་ནས་ཉི་འབུམ་བར་འབྱོར་རྒྱུའི་ཚོད་དཔག་གནང་བཞིན་ཡོད་པ་གསལ་བཤད་གནང་ཡོད་པ་རེད།
གནས་མཆོག་རྡོ་རྗེ་གདན་དུ་དུས་འཁོར་དབང་ཆེན་དང་འབྲེལ་སྟེ་ཟ་ཁང་དང་ཚོང་ཁང་སོགས་ཀྱི་ཚོང་ལས་གཉེར་མཁན་ཇི་སྙེད་ཅིག་ཡོད་ཅིང་། དུས་འཁོར་དབང་ཆེན་གྱི་གསུང་ཆོས་རྭ་བ་དང་མཆོད་རྟེན་རིན་པོ་ཆེའི་ཉེ་འགྲམ་དུ་ཡོད་པའི་ཟ་ཁང་ཁག་གི་ནང་ལ་ཡང་ཤ་ཡོད་ཀྱི་ཞལ་ལག་འཚོང་མཁན་མི་ཉུང་བ་ཞིག་མཐོང་རྒྱུ་འདུག་པ་དང་། ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་ལགས་ཀྱིས་དུས་དབང་གོ་སྒྲིག་ཚོགས་ཆུང་གི་ཚབ་གནང་སྟེ། དུས་འཁོར་དབང་ཆེན་རིང་གཙོ་བོ་༧གོང་ས་སྐྱབས་མགོན་ཆེན་པོ་མཆོག་གི་སྐུ་ཚེ་ཚེ་སྒྲུབ་ཀྱི་ཆེད་དང་། སྒོས་སུ་ཚོགས་བསགས་སྒྲིག་སྦྱོང་ཆེད་དམར་ཟས་སྤོང་རྒྱུར་འབད་བརྩོན་གནང་དགོས་པའི་སྐུལ་མ་ཤུགས་ཆེ་གནང་ཡོད་པ་རེད།

གསར་འགོད་པ་འགན་འཛིན་གཞོན་པ་སྐལ་ལྡན་བློ་གྲོས།