དཔལ་ས་སྐྱ་༧གོང་མ་ཁྲི་ཆེན་རིན་པོ་ཆེན་མཆོག་གིས་ཕྱི་ལོ་ ༢༠༢༦ ཟླ་ ༡༠ ཚེས་ ༢༡ ཉིན་འབྲས་ལྗོངས་ཀྱི་རྒྱལ་ས་སྒང་ཏོག་ཏུ་གསར་བཞེངས་ལེགས་གྲུབ་བྱུང་པའི་ཉི་ཡག་ནེེ་རཱཏྨྱ་ཆོས་ཚོགས་ཀྱི་རྟེན་དང་བརྟེན་པ་བཅས་པར་རབ་གནས་དང་དབུ་འབྱེད་གནང་པ་དང་། འབྲས་ལྗོངས་སྤྱི་ཁྱབ་བློན་ཆེན་མཆོག་དང་མཇལ་འཕྲད་གནང་ཡོད་པ་རེད།
ཆོས་ཚོགས་ཀྱི་དབུ་འཛིན་ཉི་ཡག་སྤྲུལ་སྐུ་མཆོག་གིས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་དོན་ལྟར་ན། ད་རེས་ཀྱི་དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོ་འབྲས་ལྗོངས་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་པྲེམ་སིངྒ་རྟ་མངྒ་ (Prem Singh Tamang) མཆོག་དང་ས་སྐྱ་ཁྲི་འཛིན་ཞེ་གཉིས་པ་རཏྣ་བཛྲ་རིན་པོ་ཆེ་མཆོག་གིས་དབུས་པས་འབྲས་གཞུང་དགོན་གནས་བློན་ཆེན་བསོད་ནམས་བླ་མ་མཆོག གཞན་ཡང་མངའ་སྡེའི་བློན་ཆེན་ཁག་ཅིག་དང་། འབྲས་ལྗོངས་ཁུལ་གྱི་རིས་མེད་དགོན་སྡེ་ཁག་གི་སྐུ་ཚབ་དང་མཁན་བླ་འདུས་མང་ཡོངས། དད་ལྡན་མང་ཚོགས་བཅས་བརྒྱ་ཕྲག་དུ་མ་ལྷན་འཛོམས་གནང་ཡོད་པ་རེད།
འབྲས་གཞུང་དགོན་གནས་བློན་ཆེན་བསོད་ནམས་བླ་མ་ལགས་ཀྱིས་འབྲས་ལྗོངས་མངའ་སྡེའི་སྤྱི་ཁྱབ་བློན་ཆེན་མཆོག་གིས་དུས་རྒྱུན་དུ་ནང་པ་སངས་རྒྱས་པའི་བསྟན་པ་འབྲས་ལྗོངས་ཙམ་མིན་པར་འཛམ་གླིང་ཁྱོན་ཡོངས་སུ་དར་ཁྱབ་ཡོང་ཆེད་ཐུགས་འཁུར་དང་རྒྱབ་སྐྱོར་གང་ཡོང་གནང་བཞིན་པ་ལ་འབྲས་ལྗོངས་ནང་གི་བླ་མ་དང་དགེ་འདུན་པ་ཡོངས་ཀྱི་ཚབ་ཞུས་ཏེ་ཐུགས་རྗེ་ཆེ་ཞུ་བཞིན་ཡོད་ཅེས་གསུངས་སོང་།
ཡང་ཕྱི་ཟླ་ ༡༠ ཚེས་ ༡༨ ཉིན་དཔལ་ས་སྐྱ་ཁྲི་འཛིན་ཞེ་གཉིས་པ་རཏ་ན་བཛྲ་རིན་པོ་ཆེ་མཆོག་གིས་འབྲས་ལྗོངས་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་པྲེམ་སིངྒ་རྟ་མངྒ་ (Prem singh Tamang) མཆོག་དང་མཇལ་མོལ་གནང་ཡོད་པ་དང་། སྐབས་དེར་མངའ་སྡེའི་སྤྱི་ཁྱབ་བློན་ཆེན་མཆོག་གིས་ད་རེས་རིན་པོ་ཆེ་མཆོག་གིས་མཇལ་ཁ་ཐོབ་པ་དེ་གུས་ཞབས་དང་བྱིན་རླབས་ལྡན་པའི་མྱོང་ཚོར་ཞིག་བྱུང་སོང་ཞེས་དང་། རིན་པོ་ཆེ་མཆོག་སྐུ་ཁམས་གསལ་ཐང་དང་སྐུ་ཚེ་ཡུན་རིང་བརྟན་ཅིང་འགྲོ་བ་སེམས་ཅན་ཀུན་ལ་ཕན་རླབས་རྒྱ་ཆེ་སྒྲུབ་ཐུབ་པའི་སྨོན་འདུན་ཞུས་ཡོད་པ་ཁོང་སྐུ་སྒེར་གྱི་ངོ་དེབ་ཐོག་འཁོད་འདུག
དཔལ་ས་སྐྱ་༧གོང་མ་ཁྲི་ཆེན་རིན་པོ་ཆེ་མཆོག་འབྲས་ལྗོངས་སུ་ཕེབས་པའི་མཛད་རིམ་ཁྲོད་དད་ལྡན་མང་ཚོགས་ལ་སངས་རྒྱས་སྨན་ལྷའི་དབང་དང་། དེ་བཞིན་ནུབ་སྦང་གྷལ་མངའ་སྡེའི་ཀ་ལན་སྦུག་ས་སྐྱ་རྩེ་ཆེན་ཕྲིན་ལས་དར་རྒྱས་གླིང་དགོན་པར་མཛད་རིམ་ཡོད་པ་རེད།།
བརྙན་པར་སྒྲིག་སྦྱོར་བ། པ་སངས་ཚེ་རིང་།