ཁྲི་ཟུར་བསོད་ནམས་སྟོབས་རྒྱལ་ལ་གཞུང་འབྲེལ་མྱ་ངན།

དེ་ཡང་བཙན་བྱོལ་བོད་མིའི་སྒྲིག་འཛུགས་ཀྱི་དྲ་རྒྱའི་ཐོག་གནས་ཚུལ་བཀོད་པའི་ནང༌། འདི་ཚེས་ ༣༡ གི་ཉིན་རྒྱབ་ཏུ་བཞུགས་སྒར་གངས་སྐྱིད་ལ་མང་གཙོའི་ཀ་བ་གསུམ་གྱི་མཛད་གཙོ་རྣམ་པས་དབུས་བོད་མི་མང་སྤྱི་འཐུས་རྒྱུན་ལས་རྣམ་པ། ལྷན་ཁང་ཁག་གི་དྲུང་ཆེ་ཆུང་རྣམ་པ། དེ་བཞིན་སྲི་ཞུའི་ལས་བྱེད་བཅས་ཚང་འཛོམས་ཀྱིས་སྨོན་ལམ་གསུང་འདོན་དང་འབྲེལ་ དམ་པ་དེ་ཉིད་ཀྱི་ཆེད་མྱ་ངན་གུས་འདུད་ཀྱི་གདུང་སེམས་མཉམ་སྐྱེ་མཚོན་སླད་ལས་ཁུངས་ཁག་སྒོ་བརྒྱབ་ཡོད་པ་རེད།

གནས་ཚུལ་ནང་འཁོད་གསལ་ལ་གཞིགས་ན། མཆོད་འབུལ་སྨོན་ལམ་སྐབས་སྲིད་སྐྱོང་བློ་བཟང་སེང་གེ་མཆོག་གིས་བཀའ་བློན་ཁྲི་ཟུར་བསོད་ནམས་སྟོབས་རྒྱལ་དམ་པ་དེ་ཡིས་ལོ་རྒྱུས་སྙིང་བསྡུས་ངོ་སྤྲོད་གནང་བའི་ནང༌། དམ་པ་དེ་ཉིད་ ༡༩༤༡ ལོར་ཁམས་བྲག་གཡབ་ཏུ་སྐུ་འཁྲུངས་པ་དང༌།  དགུང་ལོ་ ༡༩ ལ་ལྷ་སར་ཕེབས་ཏེ་རྭ་སྟོད་གྲྭ་ཚང་དུ་བསྡུས་གྲྭ་ནས་འགོ་བཙུགས་ཏེ་གཞུང་ཆེན་བཀའ་པོད་ལྔར་སློབ་གཉེར་གནང།  དེ་ནས་ཕྱི་ལོ་ ༡༩༥༩ ལོར་རྒྱ་གར་དུ་བྲོས་བྱོལ་དུ་ཕེབས་ནས་ཕྱི་ལོ་ ༡༩༦༠ ལོར་ཝ་རཱ་ཎཱ་སིར་རྟེན་གཞི་བྱས་པའི་ལེགས་སྦྱར་མཐོ་རིམ་སློབ་གྲྭར་སློབ་གཉེར་གནང་རྗེས།  ཕྱི་ལོ་ ༡༩༦༣ ལོར་གཞུང་ཞབས་ནང་འཛུལ་ཞུགས་ཀྱིས་ ཆོས་དོན་ལྷན་ཁང་ནང་ཕྱག་ལས་གནང་བ་དང་། དེ་ནས་རིམ་པས་དྲིལ་བསྒྲགས་དྲུང་ཆེ་གཞོན་པ་དང༌། བཀའ་དྲུང་གཞོན་པ། དྲིལ་བསྒྲགས་དྲུང་ཆེ་སོགས་ཀྱི་ཕྱག་ལས་གནང་རྗེས།  ཕྱི་ལོ་ ༡༩༩༣ ལོར་བཀའ་བློན་དུ་འདེམས་ཐོན་བྱུང་སྟེ། ཕྱི་ལོ་ ༡༩༩༣ ནས་ ༡༩༩༦ བར་སྐབས་ ༡༠ པའི་བཀའ་ཤག་གི་ནང་སྲིད་དང་འཕྲོད་བསྟེན་གྱི་བཀའ་བློན་གནང་བའི་ཐོག ཕྱི་ལོ་ ༡༩༩༥ ནས་བཀའ་བློན་ཁྲི་པའི་མཛད་འགན་བཞེས་པ་དང༌།  ཡང་ཕྱི་ལོ་ ༡༩༩༧ ལོར་སླར་ཡང་བཀའ་བློན་དུ་འདེམས་ཐོན་བྱུང་སྟེ། ཕྱི་ལོ་ ༢༠༠༡ བར་སྐབས་ ༡༡ བཀའ་ཤག་གི་བཀའ་བློན་ཁྲི་པའི་མཛད་འགན་བཞེས་ཐོག་ནང་སྲིད་དང། བདེ་སྲུང། ཆོས་རིག་ལྷན་ཁང་བཅས་ཀྱི་བཀའ་བློན་གནང་བའི་རྗེས། ཕྱི་ལོ་ ༢༠༠༡ ལོར་བཀའ་བློན་གྱི་ལས་ཡུན་གཙང་རྗེས་བགྲེས་ཡོལ་དུ་ཕེབས་པ་ཡིན་པར་ ། ད་རེས་བློ་ཕམ་གྱི་གནས་ཚུལ་ཞིག་ལ་མི་རབས་རྒན་པ་སྐུ་ངལ་སྐྱོན་མཁན་དེ་འདྲ་ཞིག་འདས་གྲོངས་ཕྱིན་པར་ཚང་མས་ཐུགས་སྨོན་ཡག་པོ་གནང་རོགས་ཞུ་རྒྱུ་ཡིན་ཞེས་གསུངས་འདུག