རྒྱ་ནག་གིས་བོད་སྐྱོར་ལས་དོན་བརྒྱུད་བོད་ལ་དབང་སྒྱུར་དང་རིགས་སྒྱུར་བྱེད་བཞིན་པ་གནད་དོན་དབྱེ་ཞིབ་པས་ངོས་འཛིན་གནང་གི་འདུག

དེ་ཡང་ཟླ་༨ པའི་ཚེས་༢༧ ཉིན། བོད་ལ་ཁ་གཏོད་རོགས་སྐྱོར་ལས་དོན་ཚོགས་འདུ་ཐེངས་བཞི་པ་ཟེར་བ་ཞིག་བོད་ཀྱི་རྒྱལ་ས་ལྷ་ས་རུ་འཚོགས་ཡོད་པ་དང་། རྒྱ་ནག་དབུས་ཆབ་སྲིད་རྒྱུན་ལས་དང་ཆབ་སྲིད་གྲོས་ཚོགས་ཀྱི་ཚོགས་གཙོ་ཝང་ཧའུ་ཉིན་ཆེད་དུ་ཡོང་ནས་གཏམ་བཤད་གཙོ་བོ་དེ་བྱས་ཡོད་པ་དང་། རྒྱ་ནག་དབུས་འཐབ་ཕྱོགས་གཅིག་གྱུར་ལྷན་ཁང་གི་འགན་འཛིན་ཧྲི་ཐེ་ཧྥུང་གིས་ཚོགས་འདུ་གཙོ་སྐྱོང་གནང་འདུག
ཝང་ཧའུ་ཉིན་གྱིས་རྩ་བའི་ཆ་ནས་ནམ་རྒྱུན་བཤད་བསྡད་ཡོད་པ། ཞི་ཅིན་ཕིན་གྱི་དུས་རབས་གསར་པའི་ཀྲུང་གོའི་ཁྱད་ཆོས་ཅན་གྱི་སྤྱི་ཚོགས་རིང་ལུགས་ཀྱི་དགོངས་པར་བརྟེན་ནས་བོད་ཀྱི་ལས་དོན་ཐམས་ཅད་གཅིག་འདོམས་བྱ་རྒྱུ་རྒྱུན་འཁྱོངས་དང་། ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་སྲོག་ཤིང་བྱས་པའི་དུས་རབས་གསར་བའི་རྒྱ་ནག་པེ་ཅིང་གཞུང་གི་བོད་སྐྱོང་སྲིད་ཇུས་ཏེ། བརྟན་ལྷིང་། འཕེལ་རྒྱས། སྐྱེ་ཁམས། མཐའ་སྟོབས་བཅས་དོན་ཆེན་བཞིར་དམ་འཛིན་བྱེད་དགོས་ལུགས་སོགས་བསྐྱར་བཤད་བྱས་འདུག
ཝང་ཧའུ་ཉིན་ལྷ་སར་ཡོང་ནས་ཁ་གཏད་བོད་སྐྱོར་ཚོགས་འདུ་ཐེངས་བཞི་པར་གཏམ་བཤད་བྱས་པའི་ཐད། བོད་རྒྱའི་གནད་དོན་ཐད་ཞིབ་འཇུག་པ་དང་། རྩོམ་པ་པོ་ལྷ་སྡེ་གནམ་ལོ་ཡག་ལགས་ཀྱིས་རྒྱ་ནག་གཞུང་གིས་བོད་སྐྱོར་ལ་ཁ་གཡར་ནས་བོད་ནང་རྒྱ་རིགས་དཔོན་རིགས་དང་མང་ཚོགས་དཀྱུས་མ་མང་པོ་ཡོང་ཐབས་བྱས་ནས་བོད་ལ་དབང་སྒྱུར་དང་རིགས་སྒྱུར་གྱི་སྲིད་ཇུས་སྤེལ་ནས། བོད་རྩ་མེད་དུ་གཏོང་རྒྱུའི་མཐའ་མའི་དམིགས་ཡུལ་འགྲུབ་ཐབས་བྱས་དང་བྱེད་བཞིན་ཡོད་པ་རེད་ཅེས་དཔྱད་བརྗོད་སྤེལ་སོང་།
ཝང་ཧའུ་ཉིན་གྱིས་ཁ་གཏད་བོད་སྐྱོར་ནི་དབུས་རྒྱ་ནག་དམར་ཤོག་གཞུང་གི་གལ་ཆེའི་འཐབ་ཇུས་དང་ཐབས་ཇུས་ཤིག་ཡིན་ཞིང་། ང་ཚོས་ཡང་དག་པའི་ལམ་ནས་བོད་སྐྱོར་བྱེད་རྒྱུ་དང་། མ་ལག་རང་བཞིན་གྱིས་བོད་སྐྱོར་བྱེད་རྒྱུ། དུས་ཡུན་རིང་པོར་བོད་སྐྱོར་བྱེད་རྒྱུར་རྒྱུན་འཁྱོངས་བྱེད་དགོས་ལུགས་ནན་བརྗོད་བྱས་པར་མ་ཟད། ཁ་གཏད་བོད་སྐྱོར་གྱི་སྤྱིའི་ཕན་འབྲས་མཐོ་རུ་འདེགས་དགོས་ཞེས་བཤད་འདུག
དེ་མིན་ཝང་ཧའུ་ཉིན་གྱིས་བོད་རང་སྐྱོང་ལྗོངས་ཁོ་ན་མིན་པར། མཚོ་སྔོན་དང་ཀན་སུའུ། སི་ཁྲོན། ཡུན་ནན་བཅས་ཞིང་ཆེན་བཞིའི་བོད་ཁུལ་གྱི་ཁུལ་དང་རྫོང་ཁག་ལའང་ཁ་གཏད་བོད་སྐྱོར་གྱི་ལས་དོན་ཏན་ཏིག་གིས་སྤེལ་ནས་འཛེར་མ་བཞིན་གང་ལ་བརྡབ་ན་དེ་རུ་ཟུག་འགྲོ་བའི་སྙིང་སྟོབས་སྤྱད་ནས་ལས་དོན་རྣམ་གྲངས་ཚང་མ་དངོས་ཡོད་བདེན་ཐོག་ལ་འཇོག་དགོས་ཞེས་བཤད་འདུག
སྤྱི་ལོ་༢༠༡༠ ལོའི་ཟླ་ ༡ པོའི་ནང་ཚོགས་པའི་བོད་ལྗོངས་ལས་དོན་བཞུགས་མོལ་ཚོགས་འདུ་ཐེངས་ལྔ་པ་ནས་བཟུང་། བོད་ཀྱི་ལས་དོན་གྱི་ཁྱབ་ཁོངས་སུ་མཚོ་སྔོན་དང་ཀན་སུའུ། སི་ཁྲོན། ཡུན་ནན་བཅས་སུ་ཆ་བགོས་བྱས་པའི་བོད་ཁུལ་བཞག་ཡོད་པ་དང་། དུས་དེ་ནས་བཟུང་བོད་ལྗོངས་སུ་སྤེལ་བའི་སྲིད་ཇུས་རིགས་བོད་ཁུལ་གཞན་དག་ཏུའང་སྤེལ་ཡོད་པ་དང་། དཔེར་ན་ཁ་གཏད་བོད་སྐྱོར་ལས་དོན་ཟེར་བ་དེ་བོད་ཁུལ་གཞན་དག་ཏུ་སྤེལ་འགོ་ཚུགས་པ་རེད།
བོད་སྐྱོར་གྱི་ལས་དོན་དེ་༡༩༥༡ ལོར་རྒྱ་ནག་དམར་ཤོག་གཞུང་གིས་བོད་ཁུལ་ཧྲིལ་བོ་བཙན་བཟུང་བྱས་པའི་རྗེས་ནས་སྤེལ་ཡོད་ལ། ཁ་གཏད་བོད་སྐྱོར་གྱི་ལས་དོན་ཟེར་བ་དེ་ཧ་ལམ ༡༩༩༥ ནས་འགོ་ཚུགས་འདུག ཁ་གཏད་བོད་སྐྱོར་ལས་དོན་ཟེར་བའི་སྲིད་ཇུས་དེ་སྤེལ་རྗེས། རྒྱ་ནག་གི་ཞིང་ཆེན་དང་གྲོང་ཁྱེར་སོ་སོས་བོད་ལྗོངས་ཀྱི་ས་ཁུལ་ཁག་ལ་ཁ་གཏད་ཀྱིས་རོགས་སྐྱོར་གྱི་ལས་དོན་སྣ་ཚོགས་ཤིག་ཡོད་པ་དང་། དེ་བཞིན་དུ་དཔལ་འབྱོར་གྱི་ཆ་ནས་ཀྱང་རོགས་སྐྱོར་ཆེན་པོ་བྱས་ཡོད་ཚུལ་རྒྱ་ནག་གཞུང་འབྲེལ་ཡིག་ཆ་ཁག་ཏུ་མང་པོ་མཐོང་རྒྱུ་ཡོད། ཡིན་ནའང་ས་གནས་བོད་མི་མང་ཚོགས་ལ་ཐད་ཀར་ཁེ་ཕན་ཅི་ཡང་རག་གི་མེད་པ་དང་། བོད་སྐྱོར་གྱི་ཁེ་ཕན་མང་ཆེ་བ་གཙོ་བོ་བོད་ལྗོངས་ཀྱི་གྲོང་ཁྱེར་ཁག་ན་ཡོད་པའི་བོད་སྐྱོར་ལས་བྱེད་པ་ཚོར་རེག་ཡོད་པ་ཞིབ་འཇུག་སྙན་ཐོ་མང་པོའི་ནང་ཐོན་ཡོད།
ཝང་ཧའུ་ཉིན་རྒྱ་ནག་སྲིད་གྲོས་ཀྱི་ཚོགས་གཙོ་ཡིན་པའི་ཆ་ནས། ལས་ཀ་ཆ་བགོ་བྱས་པའི་ཁྱབ་ཁོངས་སུ་བོད་ཡང་ཐེ་ཡོད་པས། ད་རེས་ཝང་ཧའུ་ཉིན་དང་རྒྱ་ནག་དབུས་འཐབ་ཕྱོགས་གཅིག་གྱུར་ལྷན་ཁང་གི་འགན་འཛིན་ཧྲི་ཐེ་ཧྥུང་གཉིས་ལྷ་སར་ཡོང་ནས་བོད་ལ་ཁ་གཏད་རོགས་སྐྱོར་ལས་དོན་ཚོགས་འདུ་ཐེངས་བཞི་པར་ཞུགས་ཡོད་པ་དེས། རྒྱ་ནག་གཞུང་གིས་ཁ་གཏད་བོད་སྐྱོར་ལས་དོན་ལ་གཙིགས་འཛིན་ཆེན་པོ་བྱེད་བཞིན་པ་མཚོན་ཐབས་བྱས་ཡོད།
ད་རེས་ཝང་ཧའུ་ཉིན་གྱིས་བོད་ཀྱི་རྒྱལ་ས་ལྷ་ས་དང་དེ་མིན་བོད་ལྗོངས་ལྷོ་ཁ་སོགས་ས་ཁུལ་དུ་སོང་ནས་ལྟ་ཞིབ་བྱས་འདུག

གསར་འགོད་པ། སྟག་ལྷ་རྒྱལ།
རྩོམ་སྒྲིག་པ། རིག་ལྡན་སྒྲོལ་མ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།