རྒྱ་ནག་གཞུང་དང་ཡེ་ཤུའི་ཆོས་ལུགས་ལྟེ་གནས་ཀྱི་འབྲེལ་ལམ།

༄༅༎རེས་གཟའ་མིག་དམར་ཉིན་རྒྱ་ནག་གཞུང་གིས་ཡེ་ཤུའི་གནམ་བདག་ཆོས་ལུགས་ཀྱི་ལྟེ་གནས་ལྦེ་ཊི་ཀན་དང་འབྲེལ་ལམ་བཟང་དུ་གཏོང་འདོད་ཡོད་པ་དེ་ཁ་ཞེ་གཉིས་མེད་ཡིན་པ་བརྗོད་འདུག།
ཝེ་ཊི་ཀན་དང་རྒྱ་ནག་གཞུང་དབར་རྒྱ་ནག་གཞུང་གིས་རྒྱ་ནག་ནང་ཡེ་ཤུའི་གནམ་བདག་ཆོས་ལུགས་ཀྱི་བླ་ཆེན་པོབ་ཀྱིས་བཀའ་ཁྲོལ་མེད་པར་ཡེ་ཤུའི་ཆོས་དཔོན་བསྐོ་བཞག་རིམ་པ་བྱས་པའི་དབང་གིས་ ཕན་ཚུན་དབར་མི་མཐུན་པ་ཆེན་པོ་བྱུང་ཡོད་ཀྱང་ ད་ཆ་རྒྱ་ནག་ནང་གི་ཡེ་ཤུའི་བླ་མ་པི་ཀྲར་ལུའོ་ཤུ་ཀང་ལ་རྒྱ་ནག་ནང་གི་ཡེ་ཤུའི་བླ་མ་སྦི་ཤོབ་ཏུ་བསྐོ་བཞག་བྱ་རྒྱུར་རྒྱ་ནག་གཞུང་དང་ཡེ་ཤུའི་གནམ་བདག་ཆོས་ལུགས་ཀྱི་ལྟེ་གནས་ཝེ་ཊི་ཀན་གཉིས་ཀས་མོས་མཐུན་བྱས་པར་བརྟེན་ ཕན་ཚུན་གྱི་འབྲེལ་ལམ་བཟང་དུ་འགྲོ་རྒྱུའི་རེ་བ་བྱེད་བཞིན་ཡོད་པ་རེད།
རྒྱ་ནག་ནང་གི་ཡེ་ཤུའི་བླ་མ་པི་ཀྲར་ལུའོ་ཤུ་ཀང་སྦི་ཤོབ་ཏུ་བསྐོ་བཞག་བྱ་རྒྱུའི་མཛད་སྒོ་དེ་སི་ཁྲོན་ཞིང་ཆེན་ནང་ཡོད་པའི་ ཡི་བིན་ཞེས་པའི་གྲོང་ཁྱེར་ཆུང་ངུ་དེའི་ནང་བྱེད་རྒྱུ་ཡིན་འདུག་ཅིང༌། གཟའ་མིག་དམར་ཉིན་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་མ་ཧོང་ལེས་འདིའི་སྐོར་ཐད་ཀར་འགྲེལ་བརྗོད་གང་ཡང་བྱས་མེད་ཀྱང་རྒྱ་ནག་གཞུང་གི་ངོས་ནས་ལྦེ་ཊི་ཀན་དང་འབྲེལ་ལམ་བཟང་དུ་གཏོང་འདོད་ཡོད་པ་དེ་ཁ་ཞེ་གཉིས་མེད་ཡིན་པ་བརྗོད་ཡོད་པ་རེད།